Расман: Трамп АҚШ Эронга ҳужум қилиши мумкинлигини айтди

АҚШ Президенти Дональд Трамп агар Эрон Ҳукумати тинч намойишчилар ўлдиришда давом этса, Қўшма Штатлар уларга ёрдам беришга тайёрлигини билдирди. 

“Агар Эрон одатдагидек тинч намойишчиларни отиб, шафқатсизларча ўлдирса, Қўшма Штатлар уларга ёрдамга келади”, деб ёзди Трамп ўзига тегишли Truth Social ижтимоий тармоғида.

Ўз навбатида расмий Теҳрон Трампга жавоб қайтарди. Эрон Олий Миллий Хавфсизлик Кенгаши котиби Али Ларижонийнинг айтишича, АҚШнинг Эрон ички ишларига аралашуви бутун Яқин Шарқни беқарорлаштиришга тенг ва Вашингтоннинг минтақадаги барча манфаатларини барбод қилишга олиб келади.  

“Биз норозилик билдираётган тадбиркорлар вайронкор унсурлар эмаслигига ишонамиз ва Трамп АҚШнинг бу ички масалага аралашуви бутун [Яқин Шарқ] минтақасини беқарорлаштириш ва Америка манфаатларини йўқ қилишга тенг эканлигини тушуниши керак”, деб ёзган у Х (собиқ Twitter)даги саҳифасида. 

Эслатиб ўтамиз, 28 декабрь куни Эронда оғир иқтисодий вазият ва юқори инфляция фонида бошланган беш кунлик норозилик намойишлари чоғида 6 киши ҳалок бўлди ва 17 киши жароҳат олди. Аввалига мобил телефон сотувчилари, кейинчалик бошқа соҳа вакиллари мамлакатдаги иқтисодий аҳвол ёмонлашаётганига норозилик сифатида дўконларини ёпган. Кейинчалик норозилик намойишлари бошқа йирик шаҳарларга ҳам тарқалган. 1 январь куни Эрон давлат телевидениеси ғарбий Лорестан вилоятининг Куҳдашт шаҳрида Басиж милицияси аъзоси ўлдирилганини маълум қилди. Ислом инқилоби қўриқчилари корпуси (IRGC) мазкур ҳодисада намойишчиларни айблади. Бироқ Hengaw инсон ҳуқуқлари ташкилоти ҳалок бўлган шахс хавфсизлик кучлари томонидан ўлдирилган намойишчи бўлганини даъво қилмоқда.

30 декабрь куни намойишчилар ва ҳуқуқ-тартибот органлари ўртасида дастлабки тўқнашувлар юз берган. Хавфсизлик кучлари кўздан ёш оқизувчи газ қўллаган. Хабарларга кўра, норозиликлар тез орада сиёсий тус олиб, намойишчилар “Диктаторга ўлим” ва “Қирол узоқ умр кўрсин” каби шиорларни илгари суришган.

30 декабрь куни Эрон Президенти Масъуд Пезешкиён Ички ишлар вазирига намойишчилар ва касаба уюшмалари билан мулоқот ўрнатиб, уларнинг қонуний талабларини тинглашни буюрганини эълон қилди. Шу билан бирга, хавфсизлик кучлари норозиликларни “ташқи кучлар иштирокидаги фитна” деб баҳолаб, фуқароларни намойишларда қатнашмасликка чақирмоқда. 

Маҳаллий ОАВ хабарига кўра, 1 январь куни Теҳронда жамоат тартибини бузганликда гумон қилиниб, 30 киши ҳибсга олинган.

Маълумот ўрнида, Эрон иқтисодиёти ҳозирда қарийб 40 фоизлик инфляция ҳамда ядровий дастур билан боғлиқ Ғарб санкциялари босими остида қолмоқда. Президент Пезешкиан инфляцияни пасайтириш ва аҳоли турмуш даражасини яхшилашга ваъда бермоқда.