Rasman: Advokat bo‘lish uchun 2 yillik ish staji talabi bekor qilindi

O‘zbekistonda advokatlik qilish uchun qo‘shimcha ish staji talab qilinmaydi. Bu bugun, 9 avgust kuni Prezident Shavkat Mirziyoyev tomonidan imzolangan “Advokatura to‘g‘risida”gi O‘zbekiston Respublikasi Qonunining 3-1-moddasiga o‘zgartirish kiritish haqida”gi qonunida nazarda tutilgan.

Kiritilgan o‘zgartirishga ko‘ra, advokat maqomiga ega bo‘lish istagidagi shaxs litsenziya olish uchun advokatlik tuzilmasida (advokatlik byurosida, advokatlik firmasida, advokatlar hay’atida, yuridik maslahatxonada) kamida 3 oy muddat stajirovka o‘tashi kerak hamda malaka imtihonini topshirishi shart bo‘ladi.

Ilgari talabgor shaxs yuridik mutaxassislik bo‘yicha kamida 2 yillik ish stajiga ega bo‘lish lozim edi.

Qonun rasmiy e’lon qilingan kundan e’tiboran kuchga kiradi.

Eslatib o‘tamiz, joriy yilning 4 avgust kuni Senatning qirq uchinchi yalpi majlisida O‘zbekistonda advokatlik faoliyati bilan shug‘ullanmoqchi bo‘lganlardan so‘raladigan kamida ikki yillik ish staji talabi bekor qilinishiga oid mavzu ko‘tarilgan edi.