Расман: Адвокат бўлиш учун 2 йиллик иш стажи талаби бекор қилинди

Ўзбекистонда адвокатлик қилиш учун қўшимча иш стажи талаб қилинмайди. Бу бугун, 9 август куни Президент Шавкат Мирзиёев томонидан имзоланган “Адвокатура тўғрисида”ги Ўзбекистон Республикаси Қонунининг 3-1-моддасига ўзгартириш киритиш ҳақида”ги қонунида назарда тутилган.

Киритилган ўзгартиришга кўра, адвокат мақомига эга бўлиш истагидаги шахс лицензия олиш учун адвокатлик тузилмасида (адвокатлик бюросида, адвокатлик фирмасида, адвокатлар ҳайъатида, юридик маслаҳатхонада) камида 3 ой муддат стажировка ўташи керак ҳамда малака имтиҳонини топшириши шарт бўлади.

Илгари талабгор шахс юридик мутахассислик бўйича камида 2 йиллик иш стажига эга бўлиш лозим эди.

Қонун расмий эълон қилинган кундан эътиборан кучга киради.

Эслатиб ўтамиз, жорий йилнинг 4 август куни Сенатнинг қирқ учинчи ялпи мажлисида Ўзбекистонда адвокатлик фаолияти билан шуғулланмоқчи бўлганлардан сўраладиган камида икки йиллик иш стажи талаби бекор қилинишига оид мавзу кўтарилган эди.