Раисийнинг фожиавий ўлими сабаби очиқланди

Эрон Президенти Иброҳим Раисий ўтирган вертолётнинг қулашига техник носозлик сабаб бўлган. Бу ҳақда Эроннинг IRNA агентлиги хабар берди. 

Агентлик вертолёт билан боғлиқ муаммоларнинг моҳиятига аниқлик киритмаган. 

Эроннинг Беларусдаги элчиси Алиризо Санеи эса Иброҳим Раисий вертолётининг 19 май куни "қаттиқ қўниши"га ёмон об-ҳаво шароити сабаб бўлганини айтди. Элчининг эслашича, Озарбайжондаги гидроэлектр мажмуасининг очилиш маросимидан қайтаётган Президент вертолёти ҳалокатга учраган тоғли ҳудудда “жуда қалин туман, ҳатто қор ҳам бор эди, кўриш имконияти минимал бўлган”.

“Бу нима учун бундай бўлганлигининг биринчи версияси. Шунинг учун қутқарувчилар у ерга етиб боришлари учун вақт керак бўлди. Тегишли идоралар ва мутахассислар вазиятни ҳар томондан кўриб чиқишлари, самолёт ҳалокати сабаби иқлим, техник муаммолар ёки қандайдир аралашувлар бўлганини аниқлашлари керак. Бу вақт талаб этади. Иш очган махсус гуруҳ бор. Биз бу тадқиқотлар натижаларини кутмоқдамиз", деди у.

19 май куни Эроннинг Шарқий Озарбайжон вилоятида Эрон Президенти ўтирган вертолёт ҳалокатга учради. Унда мамлакат Ташқи ишлар вазири Ҳусайн Амир Абдуллоҳиён, Шарқий Озарбайжон вилояти ҳокими Малик Раҳмати ва Табриз шаҳрининг имоми Муҳаммад Али Але Ҳошем ҳам бўлган. Эрон Қизил ярим ой жамияти раҳбари Пир Ҳусайн Коливанднинг айтишича,  ҳалокатда вертолётнинг барча йўловчилари ва экипаж аъзолари ҳалок бўлган. Эрон вице-президенти Моҳсин Мансурий президент ва унга ҳамроҳлик қилаётганларнинг ўлими ҳақидаги хабарларни тасдиқлади.

Эслатиб ўтамиз, олдинроқ Эроннинг амалдаги вице-президенти Муҳаммад Мохбер вақтинчалик Эрон Президенти бўлиши маълум қилинганди. Эрон Ташқи ишлар вазири ўринбосари Али Багери Кани эса собиқ ташқи ишлар вазири Ҳусайн Амир Абдуллоҳиён вафотидан кейин вақтинчалик ташқи ишлар вазири вазифани бажарувчи этиб тайинланди. Мамлакат парламенти Ички ишлар қўмитаси раиси Муҳаммад Солиҳ Жокар Эронда навбатдан ташқари президентлик сайловлари келаси 50 кун ичида бўлиб ўтиши кераклигини айтди. Эрон олий диний раҳбари Оятуллоҳ Али Хоманаий Президент Иброҳим Раисий ва унинг ҳамроҳлари вертолёт ҳалокатида вафот этгани муносабати билан 5 кунлик мотам эълон қилди. Марҳумлар билан видолашув маросими эртага, 21 май куни Табриз шаҳрида бўлиб ўтиши билдирилди.