Рафинья фаолиятини қайси жамоада якунлашини айтди

“Барселона”нинг бразилиялик ҳужумчиси Рафинья Каталония клубини тарк этиш ниятида эмаслигини ва фаолиятини шу жамоа сафида якунлашга умид қилаётганини айтди. Бу ҳақда бразилиялик футболчи “RAC 1” нашрига берган интервьюсида маълум қилди.

“Мен жамоани фақат бош мураббий менга ишонмаслигини айтсагина тарк этаман. Умид қиламанки, бошқа жамоага ўтмасдан, фаолиятимни шу ерда якунлайман”, дейди Рафинья.

Шунингдек, футболчи 2024 йилда Саудия Арабистони клубларидан таклиф олгани ва уларни қабул қилишга жуда яқин келганини тан олган.

“Бу оиламдаги кўплаб инсонларнинг ҳаётини ўзгартириши мумкин эди. Таклиф қилинган сумма жуда катта эди”, дейди бразилиялик футболчи.

Маълумот учун, Рафинья “Барселона” билан уч марта Испания чемпионлиги, бир марта Испания Кубоги ва уч марта Испания Суперкубоги ғолиби бўлган. У Каталония клуби сафида барча мусобақаларда 184 та учрашув ўтказиб, 86 та гол урган ва 62 та голли узатмани амалга оширган.