Рафаҳ операцияси Исроилни ҲАМАСни мағлуб этишга яқинлаштирмайди – Оқ уй

АҚШ Президенти Жо Байден Исроил Рафаҳдаги кенг кўламли операцияси билан Ғазо секторидаги ҲАМАСни йўқ қилиш мақсадига эриша олмайди, деб ҳисоблайди. Бу ҳақда кеча, 9 май куни эълон қилинган Оқ уй баёнотида сўз боради.

"Унинг (Президент Байден) фикрича, Рафаҳни мағлуб этиш билан бу мақсадга эришиб бўлмайди", деган Оқ уйнинг миллий хавфсизлик алоқалари координатори Жон Кирби журналистлар билан бўлиб ўтган брифингда.

Кирбининг қайд этишича, ҲАМАС Исроил томонидан сезиларли босимга учраган ва ҳозирда гуруҳ раҳбариятининг қолдиқларига қарши курашишнинг тинч аҳоли учун каттароқ хавф туғдирадиган операциядан кўра самаралироқ усуллари мавжуд.

"Биз қандайдир тарзда Исроилни тарк этяпмиз ёки уларга ҲАМАСни мағлуб этишда ёрдам беришни истамаймиз, деган аргумент ҳақиқатга тўғри келмайди", дейди Кирби.

Исроилнинг юқори мартабали расмийси кеча, 9 май куни Қоҳирада гаровга олинганларни озод қилиш бўйича эҳтимолий келишув бўйича музокараларнинг жорий раунди келишмовчиликларни ҳал қилмасдан якунланганини билдирди.

"Биз ҳали ҳам олдинга йўл борлигига ишонамиз, аммо бунинг учун ҳар икки томондан ҳам бир оз етакчилик керак бўлади. Музокаралар столига ўтириш ва келишувни тузиш учун ҳар икки томондан жасорат керак бўлади", деди Кирби. 

Кирбининг айтишича, Рафаҳдаги кенг кўламли қуруқликдаги операцияга муқобил вариантлар бўйича АҚШ-Исроил маслаҳатлашувлари давом этмоқда.