“Qanotchi”нинг қанотини қайирдилар. Ресторан яна ёпилди, айбдорлар жавобгарликка тортилади

Жамият 22876
image

Аввалроқ, Ўзбекистонга коронавирус инфекциясини кириб келиши ва тарқалишини олдини олиш юзасидан чора-тадбирлар дастурини тайёрлаш бўйича Республика махсус комиссиясининг чекловларига қарамасдан Тошкентдаги “Qanotchi” ресторани одатий тартибда иш бошлагани, бу эса бошқа рестораторларнинг эътирозига сабаб бўлаётгани, “Qanotchi”нинг шохи борми саволларни келтириб чиқараётгани ҳақида хабар берган эдик. Тошкент шаҳар ҳокимлиги ушбу масала расман муносабат билдирди. 

“Бу пойтахтимиз масканлари босқичма-босқич очилиши учун чора-тадбирлар тартибини ишлаб чиқиш учун зарур эди. Айни вақтда эксперимент якунига етган, ресторан ёпилган”, деб бошланади Ортиқхўжаев раҳбарилигидаги ҳокимлик изоҳи. 

Қайд этилишича, СЭОМ (Санитария-эпедимеологик осойишталик маркази), ИИББ (Тошкент шаҳар Ички ишлар бош бошқармаси) ва Тошкент шаҳар ҳокимлигининг умумий хулосасига асосан, шаҳар умумий овқатланиш масканларининг очилиши учун чоралар режаси ҳамда регламенти ишлаб чиқилади.

“Эксперимент доирасида “Qanotchi” ресторани маъмурияти ўз ҳисобидан овқатланиш залини СЭОМ меъёрлари асосида жиҳозлаб, дезинфекция ишларини амалга оширди ва меҳмонларни залда жойлаштириш, уларга хизмат кўрсатиш ва киритиш бўйича барча белгиланган чораларни ишлаб чиқди.

Батафсил фото- ва видеоҳисобот махсус Комиссияга қарор қабул қилиш учун тақдим қилиниб, унинг асосида умумий овқатланиш масканларини ишга тушириш тартиби белгиланади”, дейилади хабарда.

Такрор ва такрор эслатиб ўтиш ўринлики, Республика махсус комиссиясининг 2020 йил 8 майдаги йиғилиши баёнига мувофиқ шаҳар ва туманларда уларнинг “қизил, “сариқ” ва “яшил” тоифага киришига қараб карантин чекловларини юмшатиш белгиланганди. Бироқ шу билан бирга, ҳар қайси тоифа учун бирдек сақланиб қоладиган чекловлар ҳам маълум қилинганди. Унда кўнгилочар объектлар – тунги клублар, дискотека, ресторан, кафе, ошхона, чойхона, спа ва массаж салонлар, караоке, бильярд заллари, чилим (кальян) ва компьютер ўйинлари марказлари фаолиятига йўл қўймаслик аниқ ва тиниқ қилиб белгилаб қўйилганди. Ушбу қарорда истиснолар ёки ресторанларни янги талаблар доирасида ишга тушириш мумкинлиги ва бу борада Тошкент  шаҳар ҳокимлиги, ИИББ, СЭОМ келишилиши ҳақида миқ этилмаган. Агар рестораторлар ўз ҳисобидан овқатланиш залини СЭОМ меъёрлари асосида жиҳозлаб, дезинфекция ишларини амалга ошириб, меҳмонларни залда жойлаштириш, уларга хизмат кўрсатиш ва киритиш бўйича Тошкент шаҳар ҳокимлиги айтганидек белгиланган (қаерда белгилангани номаълум) чораларни ишлаб чиқиши ва ресторанини ишга тушириши мумкин бўлса, нега бу тартиб оммавий равишда расман эълон қилинмади?

Тошкент шаҳар ҳокимлиги “Qanotchi” ресторанининг одатий тартибда фаолиятини давом эттираётгани билан боғлиқ ижтимоий тармоқда тарқатилган ахборот муаллифларига нисбатан чора кўрилишини очиқлади.

“Рестораннинг одатий тартибда ишга тушгани ҳақида оммага тақдим қилинган маълумот юзасидан эса, нотўғри ахборот тарқатиб пойтахт аҳолисига янглиш маълумот беришда айбдорлар, қонунчиликда белгиланган тартибда жавобгарликка тортилади”, дейилади хабарда.

Хўш, белгиланган тартибда жавобгарликка тортилса, бу қайси тартиб? Бу карантин қоидаларини бузиш эмасми? Тошкент ҳашар ҳокимлиги “Qanotchi” ресторани маъмурияти ўз ҳисобидан овқатланиш залини СЭОМ меъёрлари асосида жиҳозлаб, дезинфекция ишларини амалга оширди ва меҳмонларни залда жойлаштириш, уларга хизмат кўрсатиш ва киритиш бўйича барча белгиланган чораларни ишлаб чиқди”, демоқда. Ишлаб чиқилган чоралар асосида фаолиятни тиклашга қайси ташкилот рухсат берган? Агар чоралар ишлаб чиқилган ва маъқулланган бўлса, ҳаммаси қонуний бўлса унда ресторан нега яна ёпилди? Саволлар жуда кўп. 

Дарвоқе, Республика махсус комиссияси томонидан ишлаб чиқилган каратин қоидаларига риоя қилинишини назорат қилиш Ўзбекистон Республикаси Бош прокуратураси ва Ички ишлар вазирлигига юклатилган. Хўш, бу юқори рутбали ташкилотлар нега жим? Ё “Qanotchi”нинг эмин-эркин иш бошлагани ҳақида интернетда тарқалган эълонлар уларга етиб бормадими? 

Шу ўринда қулоққа чалинган гаплардан гаплашсак. “Qanotchi” ресторани ташқи муҳитда Тошкент шаҳар ҳокими Жаҳонгир Ортиқхўжаевники деб кўриб келинади. Давлат статистика қўмитаси маълумотларида келтирилишича, рестораннинг таъсисчиси Раҳмон Позилжонов. У бир вақтлар “Akfa media” продюсерлик компаниясига раҳбарлик қилган. Компанияда фаолият юритган хонанда Жаҳонгир Позилжоновнинг акаси. Манбаларга кўра, Ортиқхўжаев ҳам оила аъзолари билан кўп бор ушбу ресторанда меҳмон бўлади. Буни эса қуйидаги видео ҳам исботлайди. 

Qalampir.uz Tahririyati
Мақолага баҳо беринг
Баҳолаганлар: 766
Рейтинг: 3
Теглар
t
×