Путиннинг парламентга мурожаатномасига дўстона бўлмаган давлатлар журналистлари киритилмайди

Кремль Президент Владимир Путиннинг жорий йил 21 февраль куни Федерал Мажлисга йўллайдиган мурожаатига дўст бўлмаган мамлакатлардан келган хорижий ОАВ журналистларини аккредитациядан ўтказмайди. Тадбирда фақат дўст давлатлардан хорижий матбуот вакиллари иштирок этиши мумкин. Бу ҳақда бугун, 15 февраль куни журналистларга Президент матбуот котиби Дмитрий Песков маълум қилди. 

"Президентнинг Федерал Мажлисга йўллайдиган мурожаатига келсак, у ерда дўст давлатлар вакили бўлган хорижий ОАВлар аккредитациядан ўтади. Биз у ерга дўстона бўлмаган давлатларнинг хорижий ОАВларини таклиф қилмаймиз", дейди Песков.  

Кремль матбуот котибининг таъкидлашича, улар исталган телеканалда жонли кўрсатувларни томоша қилган ҳолда ишлашлари мумкин. 

Жорий йилнинг 21 февраль куни Россия Федерацияси Президенти Владимир Путин мамлакат парламенти – Федерал Мажлисга мурожаат қилади. Тадбир Москвадаги “Гостиный Двор”да бўлиб ўтади. Тадбирга таклиф этилганлар ҳақида гапирар экан, Песков, меҳмонларнинг анъанавий тоифаларидан ташқари янгилари, жумладан, “махсус ҳарбий операция” иштирокчилари ҳам бўлишини таъкидлади.

Эслатиб ўтамиз, Ўзбекистон Россия Федерациясига дўстона давлатлар қаторига киритилган. Душман давлатлар қаторига Эстония, Латвия, Литва ва Украина киритилган. Грузия ва Молдова эса нисбатан дўстона давлатлар рўйхатида қайд этилган.Аммо Арманистон ва Қозоғистон "ўзгарувчан режимлар" гуруҳига кирган. Бу давлатлар билан Россия ўртасидаги муносабатлар тарихи қайта кўриб чиқила бошланади ва коммуникацияларни ривожлантириш шартлари ёмон томонга ўзгариши мумкин.