Путин Украинани теракт уюштиришда айблади

Россия Президенти Владимир Путин Брянск ва Курск вилоятларида содир бўлган терактлар учун жавобгарликни Украина раҳбариятига юклади. Бу ҳақда у бугун, 4 июнь куни ҳукумат аъзолари билан бўлган йиғилишда сўз очди. 

Қайд этилишича, Путин темирйўллар портлашига алоқадор равишда Украина билан ўт очишни тўхтатиш ёки Киев билан саммит ўтказиш зарурлиги борасида шубҳаларини билдирган.

“Бугун, катта йўқотишлар фонида ва бутун фронт чизиғи бўйлаб чекиниб, Россияни қўрқитишга уринар экан, Киев раҳбарияти террорчилик актларини уюштиришга ўтди”, деган Россия раҳбари.

Қолаверса, Путин ўртага Россия билан сулҳ тузиш масаласини ташлаган. У ҳукумат вакиллари олдига бир нечта саволлар қўйган.

“Бундай шароитда қандай қилиб юқори даражадаги учрашувлар ўтказилиши мумкин? Нима ҳақида гаплашилади? Ким террорга таянганлар билан музокара олиб боради? Террорчилар биланми?”, деган Путин.

Россия Президентининг таъкидлашича, ҳужумлар атайлаб тинч аҳоли, жумладан аёллар ва болаларни нишонга олган. У бу ҳужумларнинг Истанбулдаги тинчлик музокараларининг навбатдаги босқичи арафасида амалга оширилгани ва музокаралар жараёнини издан чиқаришга қаратилганини айтган.

Путин, шунингдек, Брянск ва Курск вилоятларида поэздлар билан боғлиқ фавқулодда ҳодисаларда ҳалок бўлганлар оилаларига ҳамдардлик билдирган.

Темирйўллар қулаши

Жорий йилнинг 31 май куни Брянск вилоятида жойлашган “Пилсино-Вигоничи” йўналишидаги бир йўлакли темирйўл бўлагида автомобиль кўпригининг устки қисми қулаб тушганди. Оқибатда ”Климово–Москва” йўналишида ҳаракатланаётган 86-сонли йўловчи поездининг локомотиви ва вагонлари рельсдан чиқиб кетган. Қолаверса, етти киши ҳалок бўлган ва 70 дан ортиқ одам жароҳат олган. 

Бошқа ҳолатда эса Курск вилоятида темирйўл кўприги поезд билан биргаликда қулаб тушган. Журналист Александр Хинштейннинг хабар беришича, Тростна-Калиновка йўлининг 48-километрида кўприк устидан поезд ўтиб кетаётган вақтида у қулаб тушган. Ҳодиса оқибатида 1 киши жароҳатланган. Поезднинг бир қисми кўприк остидаги автомобиль йўлига ағдарилган. Поезд локомотивида ёнғин бошланган, лекин Фавқулодда вазиятлар хизмати ходимлари уни тезда ўчирган. Қолган вагонлар темирйўл платформасида қолган. 

Эслатиб ўтамиз, аввалроқ Россиянинг Брянск ва Курск вилоятларида кўприкларнинг қулаши ҳолати терговчилар томонидан террорчилик ҳаракати деб баҳоланганди.