Россиядаги кўприклар қулаши теракт сифатида баҳоланди

Россиянинг Брянск ва Курск вилоятларида кўприкларнинг қулаши ҳолати терговчилар томонидан террорчилик ҳаракати деб баҳоланди. Бу ҳақда “Коммерсантъ” хабар берди.

Маълум қилинишича, тергов қўмитаси ушбу икки фожиа бўйича ҳам жиноят иши қўзғатган.

Бир ҳолатда Брянск вилоятида жойлашган “Пилсино-Вигоничи” йўналишидаги бир йўлакли темирйўл бўлагида автомобиль кўпригининг устки қисми қулаб тушган. Оқибатда ”Климово–Москва” йўналишида ҳаракатланаётган 86-сонли йўловчи поездининг локомотиви ва вагонлари рельсдан чиқиб кетган. Қолаверса, етти киши ҳалок бўлган ва 70 дан ортиқ одам жароҳат олган. Ҳодиса 31 май куни кечаси соат тахминан 22:40 да содир бўлган.

Воқеа жойидан олинган кадрларда йўловчиларнинг бир-бирига ёрдам бериб, вагонлардан чиқишга ҳаракат қилаётгани акс этган. Кечаси расмийлар барча жабрланганлар маҳаллий шифохоналарга етказилганини маълум қилган. Қолган йўловчилар вақтинча ҳудудда жойлашган мактабга жойлаштирилган. Москвага боришни истаган 247 йўловчи захира поезд орқали пойтахтга юборилган ва улар Киев вокзалига етиб борган.

Нашрга кўра, воқеа оқибатида поезд машинисти ҳам ҳалок бўлган.

Бошқа ҳолатда эса Курск вилоятида темирйўл кўприги поезд билан биргаликда қулаб тушган. Журналист Александр Хинштейннинг хабар беришича, Тростна-Калиновка йўлининг 48-километрида кўприк устидан поезд ўтиб кетаётган вақтида у қулаб тушган. Ҳодиса оқибатида 1 киши жароҳатланган. Поезднинг бир қисми кўприк остидаги автомобиль йўлига ағдарилган. Поезд локомотивида ёнғин бошланган, лекин Фавқулодда вазиятлар хизмати ходимлари уни тезда ўчирган. Қолган вагонлар темирйўл платформасида қолган.

Мамлакат ОАВлари икки ҳолатда ҳам кўприклар портлатилган бўлиши мумкинлигини иддао қилмоқда.

Эслатиб ўтамиз, аввалроқ Россиянинг Брянск вилоятида поезд ҳалокати туфайли 2 июндан 4 июнгача уч кунлик мотам эълон қилингани ҳақида хабар берилганди. Мотам кунларида Брянск вилоятининг барча ҳудудларида Россия байроғи, вилоят ва маҳаллий байроқлар ярим устунга туширилади. Ҳудуддаги маданият муассасалари ҳамда телевидение ва радиоканаллар барча кўнгилочар тадбирлар ва эфирларни бекор қилади.