Путин СНВ-3 ни узайтиришни таклиф қилди

Россия Президенти Владимир Путин Стратегик ҳужум қуролларини қисқартириш тўғрисидаги шартнома (СНВ-3) муддатини узайтиришни таклиф қилди. АҚШ Президенти Дональд Трамп бу таклифни “яхши ғоя” деб баҳолади.

Жорий йил 22 сентябрь куни Россия Хавфсизлик кенгаши мажлисида Президент Владимир Путин мамлакат ҳужжат муддати 2026 йил 5 февралда тугаганидан кейин ҳам камида бир йил давомида келишувга риоя қилишга тайёр эканини маълум қилди.

“Бу келишув меросидан тўлиқ воз кечиш кўп жиҳатдан хатоли ва кўра билмаслик бўлар эди”, деди Путин.

Шу билан бирга, у СНВ-3 амал қилиш муддати тугагач, ядровий-ракетавий салоҳиятни чекловчи охирги халқаро битим йўқолишини таъкидлади. 

“Мен учун бу яхши ғоядек туюлади”, деди Трамп кеча, 5 октябрь куни Оқ уйда бўлиб ўтган брифингда журналист саволига жавобан.

СНВ-3 2010 йилда Россия ва АҚШнинг ўша пайтдаги президентлари Дмитрий Медведев ва Барак Обама томонидан имзоланган эди. 2021 йилда шартнома яна 5 йилга узайтирилди.

Бироқ 2022 йил 24 февралда Украинага қарши тўлиқ миқёсли уруш бошланганидан сўнг Кремль раҳбари бир неча бор ядровий қурол ишлатиш билан таҳдид қилди. Шунингдек, Россия охирги йилларда ядровий доктринасини қайта кўриб чиқди ва Беларусь ҳудудига ядровий қурол жойлаштирди.

2023 йил февраль ойида эса Москва НАТОни Россиянинг стратегик объектларига қилинган зарбаларда айблаб, СНВ-3даги иштирокини тўхтатганини эълон қилди.