Путин Шавкат Мирзиёевни туғилган куни билан табриклади

Бугун, 24 июль куни Ўзбекистон Президенти Шавкат Мирзиёев 66 ёшни қаршилади. Шу муносабат билан Россия раҳбари Владимир Путин телефон орқали мулоқот қилиб, уни табриклади. Бу ҳақда Президент матбуот хизмати хабар берди.

Суҳбат аввалида Россия етакчиси давлат раҳбарини таваллуд куни билан самимий табриклаб, унга мустаҳкам соғлик, бахт-саодат, Ўзбекистоннинг барқарор тараққиёти ва равнақи йўлидаги фаолиятида муваффақиятлар тилаган.

Давлат раҳбарлари ўзаро манфаатли савдо-иқтисодий ва инвестициявий ҳамкорликни янада кенгайтириш, товар айирбошлаш суръатини таъминлаш ва саноат кооперацияси бўйича муҳим лойиҳаларни илгари суриш масалаларини муҳокама қилган.

Шунингдек, ҳудудлараро даражадаги мулоқот ва алмашинувларни самарали давом эттириш муҳимлиги ҳам қайд этилган.

Минтақавий кун тартибидаги долзарб масалалар юзасидан фикр алмашилган.

Маълумот учун, Шавкат Мирзиёев 1957 йилнинг 24 июлида Жиззах вилоятининг Зомин туманида туғилган. 2003 йил 12 декабрдан 2016 йил 13 декабргача Ўзбекистон Бош вазири, 2016 йил 8 сентябрдан 14 декабргача Ўзбекистоннинг муваққат Президенти бўлган. 2016 йил 4 декабрдаги президентлик сайлови натижасига кўра, Ўзбекистон Республикасининг Президенти этиб сайланган. Жорий йилнинг 9 июль куни муддатидан олдин бўлиб ўтган сайловда Мирзиёев 87,05 фоиз овоз билан 7 йил муддатга сайланди.