Путин Пашинянни огоҳлантирди

Россия Арманистоннинг Европа Иттифоқи билан муносабатларни ривожлантириш истагига хотиржам қарайди, бироқ Ереван бир вақтнинг ўзида ҳам Европа Иттифоқи (ЕИ), ҳам Евроосиё иқтисодий иттифоқи (ЕОИИ) билан божхона иттифоқида бўла олмайди. Бу ҳақда бугун, 1 апрель куни Россия Президенти Владимир Путин Арманистон Бош вазири Никол Пашинян билан учрашувда баёнот берди.

“Биз тушунамизки, ҳар қандай мамлакат учинчи давлатлар билан ҳамкорликдан максимал фойда излайди. Аммо бу очиқ-ойдин ва ҳалол бўлиши керак, аввалдан келишиб олиниши лозим: Европа Иттифоқи ва ЕОИИ билан бир вақтда божхона иттифоқида бўлишнинг иложи йўқ”, дейди Россия етакчиси.

Унинг сўзларига кўра, бу “соф иқтисодий характерга эга масала” ҳисобланади.

Маълумот учун, ЕОИИ – Россия, Арманистон, Қозоғистон, Қирғизистон ва Беларусь аъзо бўлган иқтисодий интеграция бирлашмасидир.

Февраль ойида Арманистон парламенти спикери Ален Симонян Россия Ташқи ишлар вазири Сергей Лавров билан учрашувда Арманистон ЕОИИдан чиқишни лозим топмаслигини қайд этган. Бунга жавобан Лавров Арманистоннинг ЕОИИга аъзолиги мамлакатнинг Европа Иттифоқига қўшилиши билан мос кела олмаслигини айтган.

Бироқ, йил бошида Пашинян мамлакатнинг Европа Иттифоқига тўлақонли аъзо бўлиш истагини билдирган. У 2024 йил март ойида мамлакат парламенти “ЕИга аъзо бўлиш жараёнини бошлаш тўғрисида”ги қонунни қабул қилганини ва бу евроинтеграция жараёнини расман бошлаганини эслатиб ўтди. Шунга қарамай, унинг сўзларига кўра, Арманистон имкони борича ЕОИИ аъзолигини ва ЕИга кириш ҳаракатларини биргаликда олиб боришни режалаштирмоқда.

Арманистон Иқтисодиёт вазирлиги эса мамлакат Евроосиё иқтисодий иттифоқи билан ҳамкорликни бошқа биронтасига алмаштирмоқчи эмаслигини, бироқ савдо шерикларини диверсификация қилиш улар учун муҳим эканини тушунтирган.

Россия Бош вазири ўринбосари Алексей Оверчукнинг фикрича, Арманистон ЕИга аъзо бўлиш қарорини қабул қилишда Европа Иттифоқининг мазмуни ўзгариб, иқтисодий блокдан ҳарбий-сиёсий иттифоққа айланаётганини ҳисобга олиши керак. У Европа Иттифоқи “Россияга нисбатан тажовузкор кайфиятда” эканига ишора қилган.