Путин Бутунжаҳон Дўстлик ўйинларини номаълум муддатга қолдирди

Россия томонидан Олимпия ўйинларига муқобил сифатида ўтказилиши  режалаштирилган ва сентябрь ойида бўлиб ўтиши керак бўлган Бутунжаҳон Дўстлик ўйинлари қолдирилди. Бу ҳақда Россия Президенти Владимир Путиннинг фармони эълон қилинди. 

Ҳужжатга кўра, дастлаб 2024 йилнинг 15-29 сентябрь кунлари Москва ва Екатеринбург шаҳарларида ўтказилиши режалаштирилган, кейин эса 2025 йилга кўчирилган Дўстлик ўйинлари махсус кўрсатма чиққунига қадар қолдирилди. Қарор “спортчилар ва спорт ташкилотларининг халқаро спорт тадбирларига эркин кириш ҳуқуқини ҳимоя қилиш” билан изоҳланади, Путиннинг фармонида аниқ сабаб кўрсатилмаган.

Қайд этиш жоиз, Россия ҳукумати Украинадаги уруш туфайли россиялик спортчиларнинг халқаро мусобақаларда иштирок этмаслигига жавобан Олимпиада йилларида Дўстлик ўйинларини ташкил этиш қарорини эълон қилган. Путиннинг тегишли фармони 2023 йил октябрь ойида имзоланган.

Халқаро Олимпия қўмитаси (ХОҚ) бу ташаббусни танқид қилиб, бу Москванинг спортни сиёсийлаштиришга қаратилган “бемаъни уриниши” эканини билдирди. ХОҚ спортчиларни Дўстлик ўйинларида қатнашишдан бош тортишга чақирди.