Путин билан учрашган Фидан Зеленский қабулида ҳам бўлди

Бугун, 30 май куни Туркия Ташқи ишлар вазири Ҳоқон Фидан расмий ташриф билан Украина пойтахти Киевга борди ва у ерда мамлакат Президенти Владимир Зеленскийнинг қабулида бўлди. Бу ҳақда Украина Президенти ўз Telegram-каналида ёзиб қолдирди.

“Бугун мен Туркия Ташқи ишлар вазири Ҳоқон Фидан билан учрашдим. Туркия ва Президент Эрдўғанга адолатли ва барқарор тинчлик йўлида кўрсатган ёрдами учун миннатдорлик билдирдим”, дея ёзган Зеленский.

Шунингдек, Президент Туркияга минг нафар асирни озод қилишда берган ёрдами учун алоҳида раҳмат айтган.

“Хусусан, россияликлар томонидан асир олинган минг нафар юртдошимизни озод қилишга олиб келган учрашувни ташкил этишда кўрсатган ёрдами учун ҳам алоҳида раҳмат айтдим. Россияда сақланаётган барча украиналикларни қайтариш – бизнинг энг асосий устувор йўналишларимиздан биридир”, деган Украина раҳбари.

Қолаверса, дипломатик ҳаракатлар, ўзаро ҳамкорликлар ҳам алоҳида муҳокама қилинган.

Зеленскийнинг қўшимча қилишича, Украина ва Туркия ҳали ҳам Россия айтган меморандумни олгани йўқ. Бу эса Россиянинг бепарволигини англатади.

“Россияликлар “1000 га 1000” алмашинувдан сўнг дарҳол тайёрлаймиз деб ваъда берган “меморандум”ни бир ҳафтадан ортиқ вақтдан бери тақдим этмаяпти. Украина бу борада ҳеч қандай ҳужжат олмаган, Туркия ҳам шундай”, дея ёзган Зеленский.

Зеленский Украина-Россия музокаралари учрашув самарасиз бўлмаслиги учун, унинг кун тартиби аниқ бўлиши ва музокараларга пухта тайёргарлик кўрилиши зарурлигини таъкидлаган. Унинг айтишича, Россия навбатдаги эҳтимолий учрашувнинг фойдасиз бўлиши учун бор кучи билан ҳаракат қилмоқда.

Маълумот учун, Туркия Ташқи ишлар вазири Хоқон Фидан 26 май куни Кремлда Россия Президенти Владимир Путиннинг қабулида бўлган. Учрашувда Россия томонидан Ташқи ишлар вазири Сергей Лавров ҳам иштирок этди. Туркия Ташқи ишлар вазирлигидаги манбаларга кўра, музокараларда Украина ва Россия ўртасидаги урушни тугатиш бўйича сўнгги ташаббуслар ва 16 май куни Истанбулда бўлиб ўтган Украина бўйича музокаралардан кейинги воқеалар, иқтисодиёт ва энергетика соҳасидаги икки томонлама муносабатлар муҳокама қилинган.

Эслатиб ўтамиз, аввалроқ Туркия Президенти Ражаб Тойиб Эрдўған Украина ва Россия ўртасида 2 июнь куни Истанбулда ўтказилиши мумкин бўлган учрашув олдидан икки томонни ўт очишни тўхтатиш бўйича музокаралар учун имконият беришга чақирганди.