Эрдўған Москва ва Киевни музокара ўтказишга чақирди

Туркия Президенти Ражаб Тойиб Эрдўған Украина ва Россия ўртасида 2 июнь куни Истанбулда ўтказилиши мумкин бўлган учрашув олдидан икки томонни ўт очишни тўхтатиш бўйича музокаралар учун имконият беришга чақирди. Бу ҳақда у бугун, 29 май куни Истанбулдаги чиқишида маълум қилди.

“Биз Россия ва Украина билан алоқадамиз. Биз уларга эшик ҳали очиқ бўлса, уни ёпиб қўймасликларини айтамиз. Ҳар бир учрашувимиз давомида суҳбатдошларимизга бу имкониятни қўлдан бой бермаслик кераклигини эслатиб ўтамиз. Минтақамизда содир бўлган бу улкан ёнғинни ўчириш инсонпарварлик бурчидир”, деди Эрдўған.

Кеча, 28 май куни Россия Ташқи ишлар вазири Сергей Лавров келаси душанба, 2 июнь куни Истанбулда Украина билан тўғридан тўғри музокараларнинг иккинчи раундини ўтказишни таклиф қилган эди. Украина янги учрашувга тайёрлигини билдирди, лекин аввало Россиянинг тинчлик шартлари билан танишиб чиқмоқчи.

“Билишимча, ҳозирча ҳеч қандай жавоб бўлмаган”, деди бугун, 29 май куни Кремль матбуот котиби Дмитрий Песков.

У Киевнинг Россия Украинага ўз тинчлик шартларини олдиндан тақдим этиш талабини “конструктив бўлмаган” деб атади.

“Россия душанба куни Истанбулда учрашишни ва бу лойиҳаларни муҳокама қилишни таклиф қилди. Шунинг учун, дарҳол талаб қилиш конструктив эмас. Бу ерда биз ё музокараларни давом эттиришга тайёрлигимизни тасдиқлашимиз керак, ёки аксинча”, деди Песков.

Украина делегацияси раҳбари, Украина Мудофаа вазири Рустам Умеров ўтган оқшом Х ижтимоий тармоғида қуйидагича ёзган:

“Россия томони жўнаб кетишига яна камида тўрт кун қолганида бизга ўз ҳужжатини кўриб чиқиш учун тақдим этиши керак. Украина ҳар доим имкон қадар конструктив бўлган ва шундай бўлиб қолади. Томонлар ўртасидаги учрашувлар натижа бериши керак. Шунинг учун ҳар бир учрашувга пухта тайёргарлик кўриш керак”.

Сўнгги ойларда Украинада ўт очишни тўхтатиш бўйича дипломатик саъй-ҳаракатлар сезиларли даражада фаоллашди, бироқ Москва жанговар тўхташдан Киев “қайта қуроллантириш, кучларини қайта тўплаш ва янги ҳужумга тайёргарлик кўриш” учун фойдаланиши мумкинлигини баҳона қилиб, сўзсиз ўт очишни тўхтатишга розилик беришдан бир неча бор бош тортди.

16 май куни Россия ва Украина делегациялари сўнгги уч йилдан ортиқ вақтдан бери биринчи марта тўғридан тўғри музокаралар ўтказди. Истанбулда бўлиб ўтган учрашув ўт очишни тўхтатиш масаласи бўйича ҳеч қандай натижа бермай якунланди, бироқ томонлар катта миқдорда маҳбусларни алмашиш бўйича келишиб олди ва бу аллақачон амалга ошди.