Президент “SOCAR” раҳбари ва “British Petroleum” катта вице-президентини қабул қилди

Бугун, 16 октябрь куни Ўзбекистон Республикаси Президенти Шавкат Мирзиёев Ёқилғи-энергетика тармоғидаги инвесторлар кенгашининг йиғилишида иштирок этиш учун мамлакатга келган Озарбайжоннинг “SOCAR” компанияси раҳбари Ровшан Нажаф ва “British Petroleum” компаниясининг катта вице-президенти Жованни Кристофолини қабул қилди. Бу ҳақда Президент матбуот хизмати хабар берди.

Қайд этилишича, мулоқот чоғида энергетика соҳасида ушбу етакчи компаниялар билан муваффақиятли ҳамкорлик йўлга қўйилгани мамнуният билан қайд этилган.

Устюрт платосидаги углеводород конларини ўзлаштириш бўйича навбатдаги амалий чора-тадбирлар муҳокама қилинган. Буюк Британиянинг “British Petroleum” компанияси ушбу йирик лойиҳага қўшилгани юқори баҳоланган.

Нефть-газ соҳасида янги лойиҳаларни илгари суриш, нефть ва нефть маҳсулотларини узоқ муддатли етказиб бериш ва сотиш тармоғини йўлга қўйиш муҳимлиги таъкидланган.

Эслатиб ўтамиз, жорий йилнинг май ойида “British Petroleum” компанияси Ўзбекистоннинг Шимолий Устюрт нефть-газ минтақасидаги олтита блок бўйича маҳсулот тақсимотига оид битим (МТБ) имзолагани ҳақида хабар берилган эди.