Президент Нукусдаги кўча бўйлаб сайр қилиб, аҳоли билан гаплашди (видео)

Бугун, 18 сентябрь куни Президент Шавкат Мирзиёев Қорақалпоғистон Республикасига ташрифи чоғида Нукус шаҳридаги янгиланган кўча бўйлаб сайр қилди. Бу ҳақда Президент матбуот хизмати хабар берди.

Қайд этилишича, шаҳарнинг Ғаресизлик, С.Камалов ва Ғ.Шеразиева кўчаларида амалга оширилган ободонлаштириш ишлари натижасида аҳоли ва шаҳар меҳмонлари учун қулай дам олиш муҳити, савдо ва кўнгилочар масканларнинг туну кун фаолият юритиши учун шароит яратилган.

Бу ишларга 2,2 миллиард сўм ажратилиб, кўчаларнинг 2,5 километрлик қисми таъмирланган ва инфратузилмаси янгиланган.

Пиёдалар йўлаклари барпо этилиб, ўриндиқлар ва чиқинди қутилари ўрнатилган. Ҳудудни тунги вақтда ёритиш учун қуёш панеллари ёрдамида ишлайдиган энергия тежамкор чироқлар ўрнатилган. Ёмғир сувларини оқизиш ва сув тўпланишининг олдини олиш мақсадида 1,5 километрлик тармоқ янгидан қурилган, мавжудлари модернизация қилинган.

Яратилган шароитлар тадбиркорлик фаолиятини ҳам жонлантирган. Ҳудудда 8 та янги тадбиркорлик субъекти иш бошлаган, яна 10 таси фаолиятини кенгайтирган. Натижада 75 та янги иш ўрни яратилган.

Давлат раҳбари кўча бўйлаб юрар экан, одамлар билан самимий мулоқот қилган, мамлакатда ҳукм сураётган тинчлик энг қадрли неъмат эканлигини таъкидлаб, эзгу тилакларини билдирган.