Португалия Украинага дрон сотишни кескин оширди

Россия-Украина уруши бошланганидан бери Португалиянинг Украинага дрон экспорти кескин ўсди. Илгари бу соҳада асосий бозорлардан бири Россия бўлган бўлса, ҳозир Киевга сотилаётган дронлар ҳажми Москвага қилинган умумий савдодан ҳам икки баравар кўп. Бу ҳақда “Euronews” ёзди.

Маълумотларга кўра, 2022 йилда Украинага дрон сотишдан тушган даромад 4 миллион еврони ташкил этган. Бу кўрсаткич 2023 йилда 23 миллион, 2024 йилда 33 миллион евро, 2025 йилда эса ўсиш янада тезлашиб, 87,3 миллион еврога чиққан. Дрон етказиб беришда асосий компаниялардан бири Калдаш-да-Раинья шаҳрида жойлашган Текевер ҳисобланади.

Бу тенденция Португалиянинг умумий ташқи савдо харитасига ҳам таъсир кўрсатган. 2019-2025 йиллар орасида Украина Португалия экспорт бозорлари рейтингида 75-ўриндан 36-ўринга кўтарилган. Шу даврда Кремль 34-ўриндан 50-ўринга тушиб кетган.

Урушгача Португалиянинг Украинага экспорти Россияга нисбатан 5-10 баравар кам эди. Бироқ 2023-2024 йилларга келиб фарқ деярли йўқолган, 2025 йилда эса Россияникидан икки бараварга ошган. Умуман олганда, Киев Португалия маҳсулотларини сотиб олиш ҳажмини 110 фоизга ошириб, энг тез ўсиш кузатилаётган экспорт бозорларидан бирига айланди.

Бу ҳамкорлик янада кучайиши мумкин. Чунки 2025 йил декабрида икки давлат сувости дронларини қўшма ишлаб чиқариш бўйича келишув имзолаган.

Эслатиб ўтамиз, аввалроқ Зеленский Яқин Шарқда узоқ давом этадиган уруш Украинага қурол етказиб беришга таъсир қилиши мумкинлигидан хавотирда экани айтилган эди.