Порахўрликка қарши курашиш виртуал академияси ишга тушади

2025 йил 1 январдан  аҳоли ва давлат хизматчиларининг коррупцияга қарши курашиш соҳасидаги билимларини узлуксиз оширишга қаратилган “Коррупцияга қарши курашиш виртуал академияси” электрон платформаси жорий этилади. Бу ҳақда Коррупцияга қарши курашиш агентлиги хабар берди.

Унга кўра, виртуал академияда ўқув фаолиятини ташкил этиш ва юритиш агентлик ҳамда Ҳуқуқни муҳофаза қилиш академияси томонидан амалга оширилади. Бу борада "Аҳоли ва давлат хизматчиларининг коррупцияга қарши курашиш соҳасидаги билимларини узлуксиз ошириш тизимини жорий қилиш чора-тадбирлари тўғрисида"ги Президент Қарори имзоланди.

Агентлик:

— ўқитилиши лозим бўлган давлат хизматчилари контингентини шакллантиради ва Академия билан келишган ҳолда йиллик ўқитиш режа-графигини тасдиқлайди;

— ўқув жараёни сифатли ташкил этилишини мониторинг қилиб боради;

— янги ўқув модулларини жорий этиш бўйича Академияга таклифлар киритади;

— ўқув жараёнига жалб қилинган давлат органлари ва ташкилотлари билан яқиндан ҳамкорлик қилади;

— Академия билан биргаликда ҳар йили Коррупцияга қарши курашиш миллий кенгашига Виртуал академия фаолияти юзасидан ахборот киритади.

Виртуал академияда ўқитиш қуйидаги контингент учун олиб борилади:

• аҳоли, тадбиркорлик субъектлари, нодавлат нотижорат ташкилотлари ва бошқа фуқаролик жамияти институтлари вакиллари;
• таълим ташкилотлари тарбияланувчилари, ўқувчилари ва талабалари;
• давлат органлари ва ташкилотларининг давлат хизматчилари;
• давлат иштирокидаги корхоналарнинг ходимлари.

Виртуал академияда ўқитиш базавий  (барча фойдаланувчилар учун бепул) ҳамда махсус ўқув курслари (тўлов-шартнома асосида) бўйича йўлга қўйилади. 

Давлат хизматчиларига махсус ўқув курсларида малака ошириш мажбурий ҳисобланади, бунда:

— ишга қабул қилинганидан сўнг уч ой ичида ўқув курсидан ўтади;

— малака оширишнинг даврийлиги ҳар уч йилда камида бир мартани ташкил этади.

Билдирилишича, коррупцияга қарши ички назорат тузилмалари ва коррупциявий хавф-хатарлар юқори бўлган давлат хизмати лавозимларида фаолият кўрсатувчи хизматчилар учун махсус курслар чуқурлаштирилган ўқув дастурлари асосида олиб борилади. Махсус ўқув курсларини муваффақиятли тамомлаганларга сертификат берилади.

Эслатиб ўтамиз, аввалроқ “Transparency International” коррупцияга қарши кураш ташкилотининг “Коррупцияни аниқлаш” индексида дунё мамлакатларидаги коррупция даражаси эълон қилиниб, 2023 йилда ўтказилган сўнгги тадқиқотга кўра, Ўзбекистон ушбу рейтингга киритилган 180 давлат орасида нечанчи ўринни қайд этгани ҳақида хабар берилганди.