Польшанинг янги Президенти ишга киришди

north_east

Польшадаги президентлик сайловида консерватор Навроцкий ғалаба қозонди

Польшанинг янги ўнг қанот консерватив Президенти Кароль Навроцкий расман давлат раҳбари сифатида қасамёд қилди. Бугун, 6 август куни президентлик сайловларида ғолиб бўлган 42 ёшли номзод парламентнинг иккала палатаси – Сейм ва Сенатдан иборат Миллий ассамблея олдидаги тантанали маросимда қасамёд қилди.

Навроцкий инаугурация нутқида қатъий ва изчил ҳаракат қиладиган “фаол Президент” бўлишини эълон қилди. У ноқонуний миграция ва Польшанинг евроҳудудга киришига қарши курашишга ваъда берди.

“Мен суверенитет ва хавфсизликни истаган фуқароларнинг овози бўламан”, деб ваъда берди янги Президент.

Шундай қилиб, икки муддат президентлигини якунлаган Анжей Дуда ўрнини тарихчи, миллатчи, евроскептик ва АҚШ Президенти Дональд Трамп тарафдори бўлган Навроцкий эгаллади.

Навроцкийнинг сайловдаги ғалабаси Дональд Тускнинг либерал ва европапараст ҳукумати учун катта муваффақиятсизлик бўлди. У Польшанинг сиёсий йўналишини ўзгартиришга ҳаракат қилиши ва бош қўмондон сифатидаги ваколатларидан, халқаро майдондаги овози ва вето ҳуқуқидан ҳукумат режаларига тўсқинлик қилиш учун фойдаланиши кутилмоқда.