Польшадаги президентлик сайловида консерватор Навроцкий ғалаба қозонди

Польшадаги президентлик сайловларининг иккинчи босқичида мухолифатдаги консерватив “Қонун ва адолат” партиясидан номзод бўлган Кароль Навроцкий энг кўп овоз тўплади. Буни бугун, 2 июнь куни эрталаб Давлат сайлов комиссияси эълон қилган сайлов натижалари кўрсатмоқда.

Бюллетенларнинг 100 фоизи санаб чиқилгач, Навроцкий 50,89 фоиз, унинг рақиби Варшава мэри Рафал Тшасковский эса 49,11 фоиз овоз олган.

Кароль Навроцкий Польша президенти лавозимида август ойида муддати тугайдиган консерватив Анжей Дуда ўрнини эгаллайди.

“Навроцкийнинг ғалабаси либерал-консерватив Бош вазир Дональд Туск бошчилигидаги Польша ҳукумати учун жиддий зарба бўлди”, деб ёзади AFP.

Яқинда ўтган президентлик сайловлари нафақат Польша, балки бутун Европа учун муҳим аҳамиятга эга: Тшасковскийнинг ғалабаси Туск ва унинг ислоҳотларига янги туртки берарди. Шу пайтгача бу ислоҳотларга амалдаги ўнг қанот миллатчи Президент Анжей Дуда тўсқинлик қилиб келган.

Дуда сингари 2023 йилгача ҳукмронлик қилган ўнг қанот миллатчи “Қонун ва адолат” партияси томонидан қўллаб-қувватланадиган Навроцкий Польшанинг Украинани янада фаол қўллаб-қувватлашини шубҳа остига қўйиши мумкин. 

42 ёшли Кароль Навроцкий янги сиёсатчи. Сайлов кампанияси давомида у “Биринчи навбатда Польша” шиори остида ташвиқот олиб борди. У мамлакатдаги бир миллионга яқин украиналик қочқинларни “Польшадан фойда олаётганликда” айблайди. Навроcкий Украинанинг НАТОга киришига қарши ва АҚШ Президенти Дональд Трампга хайрихоҳлик қилади.

Ipsos сўров институти маълумотларига кўра, жорий сайловларда сайловчиларнинг фаоллиги 2020 йилги сайловларга нисбатан сезиларли даражада ошган. Бу гал овоз беришда 71,63 фоиз сайловчилар иштирок этган бўлса, 2020 йилда бу кўрсаткич атиги 68,2 фоизни ташкил этган.

Польшада президент асосан расмий ваколатларга эга, у қуролли кучларнинг бош қўмондони, ташқи сиёсатни шакллантиришда иштирок этади ва қонунлар киритиш ёки уларга вето қўйиш ҳуқуқига эга.