Польшада қамалган наманганлик эркак Ўзбекистонга қайтарилди

Польшада жазо муддатини ўтаётган наманганлик эркак муддатидан аввал шартли озод қилиниб, Ўзбекистонга қайтарилди. Бу ҳақда “Дунё” ахборот агентлиги хабар берди.

Қайд этилишича, Ўзбекистон элчихонаси дипломатлари “Артур Грабовски” адвокатлик бюроси ҳамда Польша Чегара хизмати билан ҳамкорликда олиб борилган музокаралар натижасида наманганлик И.М. муддатидан олдин шартли равишда озод қилинган.

У олдинроқ Польшада ўлим билан якунланган йўл-транспорт ҳодисасини содир этгани учун мазкур мамлакат Жиноят кодексининг тегишли моддасига асосан судланиб, 3 йил муддатга озодликдан маҳрум этилган. 

Билдирилишича, элчихона томонидан кўрилган тезкор чора-тадбирлар ҳамда Европа Иттифоқининг Чегара ва соҳил хавфсизлиги агентлиги (Frontex) кўмагида “Варшава–Тошкент” йўналиши бўйича авиачипта харид қилинган.

Зарур расмийлаштирув ва кузатув ишлари якунига етказилгач, фуқаронинг Польшадан чиқиб кетиши ташкил этилган ва у Ўзбекистонга қайтарилган.

Эслатиб ўтамиз, аввалроқ Беларусдаги тергов ҳибсхонасида сақланаётган ўзбекистонлик аёлнинг кўзи ёриганди ва унинг фарзанди Ўзбекистонга олиб келинган эди.