Покистонда жангарилар гаровга олган поезднинг 155 нафар йўловчиси озод қилинди

Покистон хавфсизлик кучлари жангарилар томонидан гаровга олинган поезднинг камида 155 нафар йўловчисини озод қилди, деярли 30 нафар экстремист йўқ қилинди. Бу ҳақда ҳуқуқ-тартибот идораларидаги манбаларига таяниб, Geo TV телеканали хабар берди.

Қайд этилишича, ҳозирда куч ишлатар тузилмалар қолган йўловчиларни озод қилиш бўйича операцияни давом эттирмоқда. Ҳужум вақтида поездда тахминан 450 киши бўлгани айтилмоқда. Жангарилар сони номаълум. Телеканал маълумотига кўра, озод қилинган 17 нафар гаровга олинган шахс шошилинч тиббий ёрдам кўрсатиш учун шифохонага ётқизилган, бироқ уларнинг жароҳатлари ҳақида маълумот берилмаган.

Хабарларга кўра, жангарилар поездни Афғонистон ва Эрон чегарасига яқин ҳудудга ҳайдаб кетган. Гаровга олинганларни озод қилиш бўйича махсус операция бошланганидан сўнг жангарилар майда гуруҳларга бўлиниб кетган. Телеканал манбаларининг таъкидлашича, экстремистлар сунъий йўлдош телефонларидан фойдаланиб, Афғонистонда жойлашган деб тахмин қилинаётган ҳужум ташкилотчилари билан алоқа ўрнатган. Шунингдек, жангарилар гаровга олинган йўловчиларни “тирик қалқон” сифатида ишлатаётгани боис операция мураккаблашаётгани билдирилган.

Эслатиб ўтамиз, аввалроқ “Балужистон озодлик армияси” экстремистик гуруҳи жангарилари Покистонда йўловчи поездини босиб олиб, 450 кишини гаровга олгани хабар қилинган эди. Ушбу поезд Балужистон вилоятининг маъмурий маркази Кветта шаҳридан Хайбер-Пахтунхва вилоятининг маркази Пешовар шаҳрига кетаётган бўлган. Жангарилар аввал темирйўл изларини портлатиб юборган, сўнгра поездга ўт очган. Поезд машинисти жароҳатланган. Ҳужум вақтида поездни қўриқлаётган хавфсизлик ходимлари билан жангарилар ўртасида отишма юз берган.