Пезешкиён Исроил уни ўлдиришга уринганини айтди

Эрон Президенти Масъуд Пезешкиён Исроил уни ўлдиришга уринганини маълум қилди. Бу ҳақда у жорий йилнинг 5 июль куни журналист Такер Карлсонга берган интервьюсида сўз очди.

“Ҳа, улар ҳаракат қилишди, мос равишда ҳаракат қилишди, лекин бу уларга насиб этмади”, деди у бу ҳақдаги саволга жавобан.

Эрон Президентининг сўзларига кўра, суиқасдга уриниш пайтида у “қандай қилиб олдинга силжиш мукинлиги” масалалари муҳокама қилинаётган йиғилишда иштирок этаётган бўлган. Шу вақтда Исроил йиғилиш ўтаётган ҳудудга зарба беришга уринган.

Журналист Такер Карлсон ҳам Масъуд Пезешкиёндан интервью олганини маълум қилиб, Эрон ва Исроил ўртасидаги ҳарбий можаро атиги бир ярим ҳафта олдин тугагани ва у яна қайтадан бошланиши эҳтимолдан холи эмаслигини билдирган. Карлсоннинг таъкидлашича, интервьюнинг мақсади “мутлақ ҳақиқат”ни билиш бўлмаган, чунки бу имконсиз.

Эслатиб ўтамиз, Исроил жорий йилнинг 13 июнига ўтар кечаси Эронга қарши ҳарбий амалиёт бошлаганини эълон қилган, бунга сабаб сифатида Эрон яширин ҳарбий-ядровий дастур устида ишлаётганини кўрсатган эди. Бомбардимонлар ва диверсия гуруҳлари рейдлари оқибатида ядровий объектлар, йирик ядро олимлари ҳамда ҳарбий авиабазалар нишонга олинган.

Эрон эса бу айбловларни рад этган ва ўз ҳужумлари билан жавоб қайтарганди. Қарама-қарши ҳужумлар 12 кун давом этган бўлиб, жараёнга АҚШ ҳам қўшилган. 22 июнга ўтар кечаси АҚШ Эроннинг ядровий объектларига бир марталик зарба берган. Шундан сўнг, 23 июнь куни кечқурун Эрон Қатардаги “Ал-Удайд” АҚШ ҳарбий базасига ракета зарбаси берган ва бу орқали вазиятни янада кескинлаштириш нияти йўқлигини билдирган.

АҚШ Президенти Дональд Трамп Исроил ва Эрон ўзаро ўт очишни тўхтатишга келишганини, 24 соат ичида бу “12 кунлик урушни расмий тугатиш” сифатида эълон қилинишини билдирган.