Пезешкиён Исроил билан урушни тугатишнинг йўлини айтди 

Исроил томонидан ҳеч қандай шартсиз ўт очишни тўхтатиш Исроил-Эрон можаросига барҳам беришнинг ягона йўлидир. Бу ҳақда Эрон Президенти Масъуд Пезешкиён бугун, 20 июнь куни ўзининг Х'даги саҳифасида маълум қилди.

Унга кўра, Исроил тажовуз такрорланмаслиги учун кафолатлар ҳам бериши керак.

“Биз ҳамиша тинчлик ва барқарорликка интилиб келганмиз. Бироқ ҳозирги вазиятда урушни тўхтатишнинг ягона йўли – душман тажовузини сўзсиз тугатиш ва сионист террористларнинг саргузаштларига ҳозироқ ва бутунлай барҳам беришнинг қатъий кафолатидир”, деб ёзди сиёсатчи Х ижтимоий тармоғида.

Президент акс ҳолда Эроннинг душманга жавоби “қаттиқ ва оғриқли” бўлишидан огоҳлантирди.

Исроилнинг Эронга йирик зарбалари билан бошланган можаро

13 июнь куни Исроил форс давлатининг турли шаҳарларида ядровий иншоотларга ва Эрон олий ҳарбий раҳбариятининг жойлашувига кенг кўламли зарбалар беришни бошлади. Ҳужумларда Эрон бош штаб бошлиғи, Ислом инқилоби қўриқчилари корпуси бош қўмондони, бир қанча юқори мартабали ҳарбий амалдорлар ва тўққиз нафар эронлик ядро олими ҳалок бўлган. Эронда 13 июнь кунидан бери камида 585 киши ҳалок бўлди, 1300 дан ортиқ киши жароҳатланди.

Эрон бунга жавобан Исроилга баллистик ракета ҳужуми уюштирди. Расмий маълумотларга кўра, ҳужум оқибатида 24 киши ҳалок бўлган, 500 дан ортиқ киши жароҳатланган.