Пентагоннинг сирларини очган аскар айбини тан олди

Америка Қўшма Штатлари Мудофаа вазирлигининг махфий ҳужжатларини ошкор қилганликда айбланаётган АҚШ Ҳарбий-ҳаво кучларининг 22 ёшли собиқ аскари Жек Тейшейра айбини тан олиб, АҚШ прокуратураси билан келишувга эришди. Бу ҳақда “ABC News” хабар берди.

Келишувнинг бир қисми сифатида Тейшейра олтита айблов, жумладан, миллий мудофаа билан боғлиқ маълумотларни қасддан сақлаш ва узатиш бўйича айбини бўйнига олган. Бунинг эвазига прокурорлар Тейшейрага нисбатан жиддийроқ айбловлар, жумладан, жосуслик айбловини қўймасликка рози бўлган.

Шунингдек, томонлар қамоқ муддати бўйича ҳам бир тўхтамга келган. "Reuters" агентлигининг аниқлик киритишича, прокуратура Тейшейрага 16 йил 8 ойга озодликдан маҳрум қилиш жазоси тайинланишини таклиф қилмоқда. Келишувдан олдин Тейшейрага ҳар бир айблов учун 10 йилдан қамоқ жазоси хавф солаётганди.

Қайд этилишича, Тейшейра 50 минг доллар жарима тўлаши, шунингдек, ўзида қолиши мумкин бўлган барча махфий материалларни қайтариши керак.

Эслатиб ўтамиз, 2023 йилнинг апрель ойида АҚШнинг Украина, Яқин Шарқ ва Хитойга нисбатан сиёсатининг асл сабабларини очиб берувчи жами юзга яқин махфий ҳужжатлар интернетга сиздирилган эди. Махфий файлларда ҳаво ҳужумидан мудофаа тармоғини яратиш режаси ҳам бўлган. Шунингдек, АҚШ ва унинг иттифоқчилари томонидан Киевга қарши ҳужумга тайёргарлик кўришда қандай ёрдам берилаётгани ҳақидаги маълумотлар ҳам очиқланган. Ҳужжатларда кутилаётган қурол-яроғ етказиб бериш жадваллари, қўшинлар ва батальон кучлари фотосуратлари мавжуд бўлган. Кейинчалик АҚШнинг махфий ҳужжатларини ошкор қилишда гумонланаётган 21 ёшли Жек Тейшейра мамлакат Федерал қидирув бюроси томонидан ҳибсга олинди. Бостондаги суд Тейшейрани миллий мудофаа маълумотларини рухсатсиз сақлаш ва узатиш, махфий ҳужжатлар ёки материалларни рухсатсиз олиб ташлаш ва сақлашда айблади.

Мадина Отабоева