Пентагон Россияни эмас, Хитойни асосий таҳдид деб ҳисоблайди – WP 

Оқ уйнинг фикрича, Хитой ҳозирда Қўшма Штатлар учун асосий таҳдид ҳисобланиши ва Россияни жиловлаш эса Европа иттифоқчилари зиммасига юклатилиши керак. Бу ҳақда кеча, 29 март куни Пентагон раҳбари Пит Ҳегсет томонидан ўз қўл остидагиларга юборилган АҚШ Мудофаа вазирлигининг устувор йўналишлари ҳақидаги ички циркульярга таяниб, “The Washington Post” хабар берди.

WP томонидан кўрилган махфий ҳужжат миллий мудофаа бўйича вақтинчалик стратегик қўлланмадир. У март ойи ўрталарида Пентагонга тарқатилган ва департаментнинг юқори лавозимли амалдорлари учун устувор вазифалар тизимини белгилаб беради.

Пентагоннинг йирик давлат билан мумкин бўлган урушга тайёргарлик кўриш учун кучларни режалаштириш концепцияси фақат Пекин билан зиддиятни ҳисобга олади. Ҳужжатга кўра, Москва таҳдиди асосан Европа иттифоқчиларига тегишли бўлиб қолади.

Қўлланмада, шунингдек, Пентагон Европа, Яқин Шарқ ва Шарқий Осиёдаги иттифоқчиларни мудофаага кўпроқ маблағ сарфлаш ва Россия, Шимолий Корея ва Эрон таҳдидларини олдини олишда етакчи роль ўйнашга мажбур қилиши айтилади.

Хитойга эътиборни қайта тиклаш минтақада АҚШ қўшинларининг кўпайиши ва қотиб қолган ва ерости нишонларини йўқ қиладиган бомбаларга кўпроқ эътибор беришни ўз ичига олади.

Пентагон, шунингдек, Ҳинд-Тинч океани минтақасида АҚШ қўшинларини жойлаштиришни ҳимоя қилишни кучайтириш, стратегик захираларни яратиш ва логистикани яхшилашга чақирмоқда.

Махфий меморандум, шунингдек, Қўшма Штатларни “яқин хориждаги”, жумладан Гренландия ва Панама каналидаги таҳдидлардан ҳимоя қилишни ҳам назарда тутади. Бундан ташқари, ҳужжатда ҳарбийларга ноқонуний миграция ва гиёҳванд моддалар савдосига қарши фаолроқ курашиш бўйича кўрсатмалар берилган.

“Йўриқнома Конгресснинг миллий хавфсизлик қўмиталарига тақдим этилди, у ерда республикачилар ва демократлар буни чалкаш деб таърифлади”, деди исмини ошкор этмаган манба нашрга.

Унинг қайд этишича, ҳужжат бир вақтнинг ўзида аксарият давлатлар, жумладан, Яқин Шарқдан ҳам қўшинларни олиб чиқишни талаб қилади, бироқ айни пайтда Трамп маъмурияти Ямандаги ҳусийларни жиловлаш ва Эронга босим ўтказишга эътибор қаратган.

“Биз дунёда ҳарбий устунликни ва ҳамма жойда бўлишни хоҳлаймиз, лекин айни пайтда, ҳеч қаерда бўлишни истамаймиз”, дея изоҳ берди WP манбаси.