“Орешник” Европада қўлланган энг узоқ масофали қурол бўлди – NYT

Россиянинг ўрта масофага учувчи баллистик ракетаси “Орешник” Европа қитъасидаги можароларда қўлланган энг узоқ масофали қуролга айланди. Бу ҳақда Ғарб ҳарбий таҳлилчиларига таяниб, “The New York Times” хабар берди.

АҚШнинг Мидлбери халқаро тадқиқотлар институти ядро тарқалишини олдини олиш дастури директори Жеффри Льюисга кўра, Украинадаги “Южмаш” ракета заводига “Орешник” зарбаси Украина кучларига жиддий зарар етказган.

Вашингтоннинг Стратегик ва халқаро тадқиқотлар маркази (CSIS) ракетага қарши мудофаа дастури раҳбари профессор Том Карако фикрича, “Орешник” “жуда ката” зарар етказади, чунки унинг бўлинувчи жанговар қисмлари ниҳоятда юқори тезликда ҳаракат қилади. Бундан ташқари, бундай жанговар каллакларни ҳаво ҳужумидан мудофаа тизимлари билан тўхтатиб қолиш деярли имконсиз.

Эслатиб ўтамиз, аввалроқ Россия Президенти Владимир Путин Украинанинг АҚШ ва Британия ракеталари ёрдамида Курск ва Брянск вилоятларидаги Россия ҳарбий объектларига қилган ҳужумларига жавобан “Орешник”нинг ядросиз вариантини қўллаганини маълум қилган эди. Ушбу ракеталар Украинадаги мудофаа саноати комплекси – Днепр шаҳридаги “Южмаш” заводига қарши ишлатилган.