Орбан Украинага жиддий айблов қўйди

Украина махсус хизматлари мамлакатда Украинанинг Европа Иттифоқига қўшилиши бўйича референдум ўтказилмаслиги учун Венгрияга қарши операция бошлади. Бундай айблов билан Бош вазири Виктор Орбан кеча, 13 май куни миллий телевидение ва ижтимоий тармоқларда чиқиш қилди.

Орбан хорижий разведка хизматлари таҳдиди юзасидан кеча, 13 май куни Мудофаа кенгашини чақирганини айтди.

“Мен уни чақирдим, чунки сўнгги кунларда Венгрияга нисбатан махфий хизматларнинг мисли кўрилмаган ҳужуми уюштирилди. Украина бизнинг Европа Иттифоқига аъзолик бўйича овоз бериш ташаббусимизга тўсқинлик қилиш учун Венгрияга қарши мувофиқлаштирилган туҳмат кампаниясини бошлади.

Мудофаа кенгаши йиғилиши, шунингдек, украиналиклар нафақат бу ҳаракатни амалга оширишга уринганини, балки Венгрия мухолифати ёрдамида Венгрия Қуролли кучларига ҳужум уюштирганини ҳам кўрсатди. Венгрия мухолифат партияси фаолияти Украина махсус хизматлари томонидан ўтказилаётган операцияда иштирок этган – бундай иш олдин ҳеч қачон содир бўлмаган”, деди Бош вазир “Тиса” партиясини назарда тутиб.

Қайд этиш жоиз, “Тиса” партияси раҳбари, Европарламент депутати Питер Мадьяр яқинда Венгрия ҳукумати тинчлик ҳақида гапираётган бир пайтда, Венгрия армияси гўёки урушга тайёрланаётганини айтганди. Брюсселда қўллаб-қувватлаётган Мадьярнинг баёнотлари Будапештдаги расмийлар томонидан дарҳол рад этилди.

Бироқ Венгрия ҳукумати Украинадан ҳам, ички мухолифатдан ҳам бундай ҳаракатлар давом этишини кутмоқда.

“Венгрия махфий хизматлари бунга тайёр”, деб огоҳлантирди Орбан.

У, шунингдек, референдумнинг олдини олишга уринишларга қарамай, у бўлиб ўтиши ва мамлакат фуқаролари Украинанинг ЕИга қабул қилиниши масаласи бўйича ўз фикрларини билдиришлари мумкинлигини таъкидлади.

“Овоз бериш бўлиб ўтади, чунки на Брюссель, на Киев бу масалани биз учун ҳал қила олмайди”, деди Бош вазир.

Сўнгги кунларда Венгрия ва Украина ўртасида мисли кўрилмаган жосуслик можароси авж олди. 9 май куни Украина хавфсизлик хизмати Венгрия ҳарбий разведкаси учун ишлаганликда айблаб, икки киши ҳибсга олинганини эълон қилди.

Шундан сўнг Венгрия Украинанинг Будапештдаги элчихонасининг икки да дипломатини айғоқчиликда айблаб, мамлакатдан чиқариб юборди, Украина эса бунга жавобан икки венгер дипломатини Киевдан чиқариб юборди.