Олимпиада очилиш маросимида Исроил делегациясига ҳуштакбозлик қилинди (видео)

Бугун, 7 февралга ўтар кечаси Италияда Милан-Кортина–2026 қишки Олимпия ўйинларининг тантанали очилиш маросими бўлиб ўтди. Мазкур тадбирда Исроил спортчилари делегацияси трибуналар томонидан ҳуштакбозлик билан қарши олинди.

Спортчилар паради Миландаги “Сан-Сиро” стадионида бўлиб ўтди. Манбаларга кўра, исроиллик спортчилар ўтиб кетаётган пайтда трибунадан ҳуштак ва бақириқлар эшитилган. Ушбу товушлар телетрансляция вақтида баланд мусиқа орқали қисман бостирилгани айтилмоқда.

Шунингдек, стадионда бўлиб турган АҚШ вице-президенти Жей Ди Вэнсга нисбатан ҳам ҳуштак чалиш ҳолатлари кузатилди. АҚШ делегацияси саҳнага чиқаётганида стадион мониторларида Венс тасвири кўрсатилгани аренадаги ҳуштакларга сабаб бўлгани таъкидланмоқда.

Маълумот учун, Милан-Кортина–2026 қишки Олимпия ўйинлари кеча, 6 февраль куни бошланиб, жорий йилнинг 22 февраль кунига қадар давом этади.

Эслатиб ўтамиз, аввалроқ қишки Олимпия ўйинларининг тантанали очилиш маросимида Ўзбекистон делегацияси ҳам иштирок этгани ҳақида хабар берилган эди.