“Охирги нафасимизгача курашамиз”. Эрон АҚШ ва Исроилни тавбасига таянтиришга ваъда берди

Хатам ал-Анбиё марказий штаби қўмондони Али Абдуллоҳий Эрон АҚШ ва Исроилга қарши урушни улар Ислом Республикасига қарши бошлаган агрессиясидан афсусланмагунча давом эттиришини билдирди. Бу ҳақда у “Al Jazeera”га берган интервьюсида сўз очди.

Унинг айтишича, Эрон замонавий ва юқори аниқликка эга қуролларга эга бўлиб, бу қуроллар мамлакат ҳарбий қудрати ҳақида рақиблар тасаввур қилганидан ҳам устун.

Қўмондон Эрон Қуролли кучлари Ислом Республикасини охирги нафасигача ҳимоя қилишини ва душманларни қилган ҳаракатларидан афсусланишга мажбур қилишини таъкидлаган.

Али Абдуллоҳийнинг сўзларига кўра, АҚШ ва Исроил Эронга нисбатан ҳаракатларида доимо хато ҳисоб-китоб қилган. У Эрон бир неча бор душманга жанг майдонида жавоб беришини айтган.

Шунингдек, у рақиблар Эроннинг ракета арсенали ҳақида ҳамма нарсани биламиз, деб ўйлаётганини танқид қилган ва жанг майдонида Ислом Республикасининг тийиб туриш кучини аслида билмасликларини айтган.

Қўмондон Эрон Қуролли кучлари давом этаётган АҚШ-Исроил урушда ҳалок бўлганлар, жумладан Ислом инқилоби раҳбари Али Хоманаий қони учун қасос олишга қатъий қарор қилганини билдирган.

Унинг таъкидлашича, душман Эрондаги ўқувчилар ва тинч аҳолига ҳужум қилиб, уй-жойларни вайрон қилмоқда. Шу билан бирга, Эрон уларнинг ҳарбий объектлари, техникаси ва бошқа зарур нишонларига зарба беришини маълум қилган.

Али Абдуллоҳий Эрон Ислом Республикаси ва Эрон халқи охир-оқибат урушда ғалаба қозонишига ишонч билдирган.

Эслатиб ўтамиз, 28 февраль куни АҚШ ва Исроил Эронга қарши янги кенг кўламли ҳарбий операцияни бошлаган. Бунга жавобан Эрон ракета ва дронлар ёрдамида Исроил назоратидаги ҳудудлар ҳамда минтақадаги АҚШ ҳарбий объектларига зарбалар берган.