Оққўрғондаги боғчада заҳарланган болалар кўпайди

Жорий йилнинг 13 август ҳолатига кўра, Тошкент вилояти Оққўрғон туманидаги 5-сонли давлат мактабгача таълим ташкилотининг жами 30 нафар тарбияланувчисида интоксикация синдроми белгилари билан тиббиёт муассасаларига ётқизилди. Бу ҳақда Мактабгача таълим вазирлиги маълум қилди.

12 август ҳолатида жами 25 нафар тарбияланувчи тиббиёт муассасаларида даволанаётгани ҳақида хабар берган эдик. 13 августда яна 5 нафар тарбияланувчида касалликнинг клиник белгилари кузатилгани учун тиббиёт муассасаларига ётқизилди.

Улардан жорий йилнинг 13 август 16:00 соат ҳолатига:

• 9 нафар тарбияланувчиларга тор доирадаги мутахассислар кўригидан сўнг қониқарли аҳволда яшаш жойи бўйича тиббий назоратга олиниб, уйларига рухсат берилди;
• тиббиёт муассасаларида жами 21 нафар тарбияланувчи даволанмоқда, жумладан 1 нафарининг ҳолати ўта оғир, 1 нафари оғир, 6 нафари ўрта оғир ва 13 нафар беморнинг ҳолати ўртача баҳоланмоқда.

Эслатиб ўтамиз, Оққўрғон туманида боғча тарбияланувчилари заҳарланганлиги ҳолати юзасидан Жиноят кодексининг 2571-моддаси (Санитарияга оид қонунчиликни ёки эпидемияга қарши кураш қоидаларини бузиш) билан жиноят иши қўзғатилган.