Одамлар СИ билан доимий мулоқот сабабли чат-ботлар каби гапиришни бошлади – WSJ

ChatGPT, Claude ва бошқа нейротармоқлардан мунтазам фойдаланадиган одамлар чат-ботларга хосликни оддий суҳбатларга, ишчи ёзишмаларга ва ҳамкасблар билан мулоқотга кўчира бошлади. Бу ҳақда “The Wall Street Journal” ёзмоқда.

Нашр Стокгольмдаги венчур компанияси ҳамкори Сара Виммеркранцни мисол қилиб келтиради. Яқинда у ишчи учрашувни “Бу эрталабки учрашув эмас, бу қайта юкланиш” деган жумла билан бошлаган – бу чат-ботлар жавобларига хос бўлган қарама-қарши қўйиш конструкциясидир. Унинг сўзларига кўра, ходимлар тобора кўпроқ қисқа, таъсирчан ибораларни ва “даҳолик” ёки “жуда ақллисан” каби ноодатий даражадаги кўтаринки мақтовларни қўлламоқда.

Баъзилар бундай ибораларни “Claude тили” деб атамоқда. Стартаплардан бирининг рекрутинг бўлими раҳбари Уилл Барнеттнинг WSJ’га маълум қилишича, унинг шахсий хатлари ва Slack’даги хабарлари янада расмийроқ ва “шахссизроқ” бўлиб қолган. Ҳозирда у нейротармоқ томонидан генерация қилинган матнга камроқ ўхшаши учун ўзи мустақил ёзган матнни таҳрирлаб туради. 

“У мени ўзига кўпроқ ўхшашга ўргатди, аксинча эмас”, дейди Барнетт.

Стартап асосчилари муҳитида яна бир феномен – “ғор одами нутқи” (cave man speak) пайдо бўлди. Фойдаланувчилар СИга топшириқ қўядиган ўта қисқа буйруқлар, масалан “Нeга белгиланган рўйхат йўқ?” шундай аталади. СИ бўйича консультант Элли К. Миллернинг айтишича, бундай услуб аллақачон промптлардан кундалик мулоқотга ўтган.

Нейротармоқлар билан ўзаро таъсир қилиш манераси ишчи учрашувларга ҳам таъсир ўтказмоқда. Агар кимдир ўз фикрини жуда узоқ тушунтирса, ҳамкасблари тил модели учун сўров шакллантиришга ўхшаш тарзда “Мақсад нима?” деган савол билан унинг гапини бўлишлари мумкин. Бу бир вақтнинг ўзида учрашувларни ёзиб олувчи СИ-агентларга аниқроқ қайдлар тузишга ёрдам беради.

Сан-Францискодаги СИ-стартапларидан бирида ҳатто “промптлар тили”ни ҳисобга олиш учун махсус доска тузилган. Ходим нейротармоқларга хос иборани қўллаган ҳар бир сафар белги олади. Рўйхатга “ҳақиқатан ҳам”, “жиддий аҳамиятга эга”, “рад этиб бўлмайдиган далил”, “X – бу янги Y” конструкцияси ва дефис орқали ёзиладиган ноодатий қўшма иборалар кирган. Ҳафта давомида энг кўп белги тўплаган киши ишдан кейинги ҳамкасблар йиғилиши учун ҳақ тўлайди.

Шу билан бирга, WSJ суҳбатдошларининг баъзилари СИга хос тил ChatGPT пайдо бўлишидан анча олдин ҳам мавжуд бўлганини таъкидлайди: тил моделлари уни кўп жиҳатдан бизнес адабиёти, юридик ҳужжатлар ва корпоратив нутқдан ўзлаштирган. Бироқ нейротармоқларнинг кенг тарқалиши ушбу услубни кундалик мулоқотда сезиларли даражада кўзга ташланадиган қилди.

“Ҳамманинг гапи сайқалланган, аммо ҳеч кимнинг нутқи алоҳида қизиқарли туюлмайди”, дейди йигирма йилдан бери компания раҳбарларини корпоратив жаргондан холи қилишга ҳаракат қилаётган PR-мутахассиси Анжела Ниббс.

Эслатиб ўтамиз, аввалроқ Хитойнинг Moonshot AI компаниясига тегишли Kimi сунъий интеллект модели хавфсизлик чекловларини четлаб ўтган тадқиқотчиларга биологик қурол ясаш ва суиқасд уюштириш бўйича маълумотлар бергани ҳақида хабар қилинган эди.