Нурхон Қурбонова Пара Осиё ўйинлари рекордини янгилади

Ўзбекистонлик пара енгил атлетикачи Нурхон Қурбонова Хитойнинг Ханчжоу шаҳрида бўлиб ўтаётган VI ёзги Осиё ўйинларида мусобақа рекордини янгилади. Бу ҳақда QALAMPIR.UZ мухбири Шахзод Шукуров хабар берди. 

Унинг маълум қилишича, бугун, 26 октябрь куни Пара енгил атлетиканинг аёллар ўртасида F54 классида найза улоқтириш баҳсларида иштирок этган Ўзбекистон вакили Нурхон Қурбонова 18.95 метр натижа билан Пара Осиё ўйинлари рекордини янгилаган ва олтин медалга сазовор бўлган.

Шунингдек, пара пауэрлифтинг бўйича аёллар ўртасида -67 кг вазн тоифасида баҳсларда иштирок этган Қудратой Тошпўлатова 116 кг натижа билан кумуш медални қўлга киритган. 

Делегацияга куннинг навбатдаги медалини пара енгил атлетиканинг аёллар ўртасида Т11 классида 200 метрга югуриш баҳсларида иштирок этган Асила Мирзаёрова келтирган. У Т11 классида кечган баҳсда маррага учинчи бўлиб етиб келган ҳолда бронза медалига эга чиққан.

Маълумот учун, ҳозирда делегация ҳисобида жами 62 та медаль (20 та олтин, 19 та кумуш, 23 та бронза) бор. Ўзбекистон бу орқали медаллар жамғариш бўйича рейтингнинг 4-поғонасини эгаллаб турибди.