Ноёб ҳодиса: дунёдаги энг қуруқ чўллардан бири гулларга бурканди

Чилидаги Атакама чўлининг катта қисми кучли ёмғирдан кейин ранг-баранг гулларга бурканди. Бу ҳақда “Associated Press” хабар берди.

Қайд этилишича, дунёдаги энг қуруқ қутбсиз чўл ҳисобланган Атакамада жорий йил бошида Эл-Ниньо об-ҳаво ҳодисаси таъсирида кучли ёғингарчилик кузатилган. Натижада миллионлаб уруғлар ва пиёзчалар униб, гуллаган. Уларнинг айримлари ўнлаб йиллар давомида тупроқ остида фаол бўлмаган.

Чилининг Миллий ўрмон хўжалиги корпорацияси (CONAF) маълумотига кўра, ҳудудда 200 дан ортиқ ўсимлик тури гуллаган. Қизил ва сариқ наньюка, бинафша рангли гуллар, оқ суспиро, тўқ сариқ терсьопело ҳамда Атакаманинг рамзий ўсимликларидан бири ҳисобланган гарра де леон чўл манзарасини ўзгартирган.

Мутахассисларнинг қайд этишича, июль ва август ойларида Чилининг айрим ҳудудларида ёғингарчилик миқдори рекорд даражага етган. Баъзи жойларда 160–190 миллиметргача ёмғир ёққан. Бу кўрсаткичлар кузатувлар бошланган 1950-йиллардан бери қайд этилган энг юқори натижалардан бири бўлган.

Кучли ёмғирлар натижасида бу йил гуллаган чўл ҳудуди тахминан 17 минг квадрат километрни ташкил этган. CONAF прогнозларига кўра, бу 1997 йилдан бери энг кенг ва жадал гуллаш мавсуми бўлиши мумкин.

Мутахассислар айрим уруғлар, пиёзчалар ва бошқа биологик материаллар ўнлаб йиллар давомида фаол бўлмаган ҳолатда сақланиб, етарли намлик пайдо бўлганда яна унишини айтган.

Табиатдаги ушбу ноёб ҳодиса сайёҳларнинг ҳам эътиборини тортган. Чили Миллий туризм котибияти маълумотларига кўра, гуллаган чўлни томоша қилиш учун ҳудудга ноябргача қарийб 300 мингта сайёҳлик ташрифи амалга оширилиши кутилмоқда.

Эслатиб ўтамиз, аввалроқ Чили шимолидаги одатда ниҳоят қуруқ иқлими билан танилган Атакама чўлида жорий йилнинг август ойида кетма-кет келган қишки бўронлар сабаб кенг ҳудуд қор билан қоплангани ҳақида хабар берилган эди.