Noyob hodisa: dunyodagi eng quruq cho‘llardan biri gullarga burkandi

Chilidagi Atakama cho‘lining katta qismi kuchli yomg‘irdan keyin rang-barang gullarga burkandi. Bu haqda “Associated Press” xabar berdi.

Qayd etilishicha, dunyodagi eng quruq qutbsiz cho‘l hisoblangan Atakamada joriy yil boshida El-Nino ob-havo hodisasi ta’sirida kuchli yog‘ingarchilik kuzatilgan. Natijada millionlab urug‘lar va piyozchalar unib, gullagan. Ularning ayrimlari o‘nlab yillar davomida tuproq ostida faol bo‘lmagan.

Chilining Milliy o‘rmon xo‘jaligi korporatsiyasi (CONAF) ma’lumotiga ko‘ra, hududda 200 dan ortiq o‘simlik turi gullagan. Qizil va sariq nanyuka, binafsha rangli gullar, oq suspiro, to‘q sariq tersopelo hamda Atakamaning ramziy o‘simliklaridan biri hisoblangan garra de leon cho‘l manzarasini o‘zgartirgan.

Mutaxassislarning qayd etishicha, iyul va avgust oylarida Chilining ayrim hududlarida yog‘ingarchilik miqdori rekord darajaga yetgan. Ba’zi joylarda 160–190 millimetrgacha yomg‘ir yoqqan. Bu ko‘rsatkichlar kuzatuvlar boshlangan 1950-yillardan beri qayd etilgan eng yuqori natijalardan biri bo‘lgan.

Kuchli yomg‘irlar natijasida bu yil gullagan cho‘l hududi taxminan 17 ming kvadrat kilometrni tashkil etgan. CONAF prognozlariga ko‘ra, bu 1997 yildan beri eng keng va jadal gullash mavsumi bo‘lishi mumkin.

Mutaxassislar ayrim urug‘lar, piyozchalar va boshqa biologik materiallar o‘nlab yillar davomida faol bo‘lmagan holatda saqlanib, yetarli namlik paydo bo‘lganda yana unishini aytgan.

Tabiatdagi ushbu noyob hodisa sayyohlarning ham e’tiborini tortgan. Chili Milliy turizm kotibiyati ma’lumotlariga ko‘ra, gullagan cho‘lni tomosha qilish uchun hududga noyabrgacha qariyb 300 mingta sayyohlik tashrifi amalga oshirilishi kutilmoqda.

Eslatib o‘tamiz, avvalroq Chili shimolidagi odatda nihoyat quruq iqlimi bilan tanilgan Atakama cho‘lida joriy yilning avgust oyida ketma-ket kelgan qishki bo‘ronlar sabab keng hudud qor bilan qoplangani haqida xabar berilgan edi.