Noqonuniy qurilgan “Askiya city” mansabdorlariga jinoyat ishi qo‘zg‘atildi

Poytaxt Toshkentning Yakkasaroy tumani Jamshid Shoshiy ko‘chasida noqonuniy qurilgan saroy – “Askiya city” majmuasi muassisi “INSOFT INVEST” MCHJ mansabdorlariga jinoyat ishi ochilgan. Hozirda ish Jinoyat ishlari bo‘yicha Yakkasaroy tuman sudida ko‘rib chiqilmoqda. Bu haqda QALAMPIR.UZ manbaasi xabar berdi.  

2021 yil 6 aprel kuni Toshkent tumanlararo Iqtisodiy sudi sudyasi Dilbar Xayrullayeva tomonidan hal qiluv qarori chiqarilgan edi. Unga ko‘ra “INSOFT INVEST” MCHJ va “GRAND HOUSE” MCHJ tomonidan qurilgan “Askiya city” turar joy majmuasi noqonuniy qurilma sifatida e’tirof etilib, bino qurilish kompaniyasi hisobidan buzib tashlash belgilangan.

Oradan 10 oy o‘tganiga qaramay, qaror ijrosi bajarilmagani bois Yakkasaroy tuman prokuraturasi tomonidan “INSOFT INVEST” MCHJ mansabdorlari M.Z.Qurbanov xamda A.M.Ochilovga nisbatan o‘tgan yilning 13 avgust kuni O‘zbekiston Respublikasi Jinoyat kodeksining 192¹¹-moddasi, 1-qismi (nodavlat tijorat tashkilotida yoki boshqa nodavlat tashkilotida mansabdor shaxslar tomonidan o‘z vakolatlarini suiiste’mol qilish), 229-modda 1- qismi (yer uchastkalarini o‘zboshimchalik bilan egallab olish) va 168- modda (firibgarlik) alomatlari bilan jinoyat ishi qo‘zg‘atilgan.

Bugunga kelib tergov harakatlari tugab, mazkur jinoyat ishlari birlashtirilgan holda Jinoyat ishlari bo‘yicha Yakkasaroy tuman sudida, sudya A.Jalilov raisligida ko‘rib chiqilmoqda. 

Toshkent shahar Yakkasaroy tumani Jamshid Shoshiy ko‘chasida yashovchi fuqarolarning murojaati asosida Toshkent shahar Yakkasaroy tuman prokuraturasi, tuman prokurori adliya maslahatchisi N.A.Allabergenova tomonidan fuqarolarga javob xati kelgan (30.09.2021).

Unda shunday deyiladi:

“Fuqarolik ishlari bo‘yicha Yakkasaroy tumanlararo sudining 09.04.2021 yilda ijro varaqasiga asosan qarzdor “INSOFT INVEST” MCHJning xatti-harakatlani Qonunga xilof deb topish hamda Yakkasaroy tuman J.Shoshiy 2-tor ko‘chasi, 1/2-uy va 1/2-uy orqasida o‘zboshimchalik bilan qurilgan qayta qurish ishlarini o‘z holatiga keltirish majburiyatini yuklash to‘g‘risidagi ijro hujjati bo‘lim ish yurituviga 2021 yilning 12 may kuni kelib tushgan va ijro ishi yuritishni o‘rganish to‘g‘risida Qaror qabul qilingan. 

Ijro xarakatlari jarayonida qarzdor “INSOFT INVEST” MCHJ rahbari M.Z.Qurbanov ijro ishi yuritishni qo‘zg‘atish to‘g‘risidagi qaror bilan tanishtirilib, o‘tgan yilning 11 iyun kuni majburiyatnoma olingan. Ijro xarakati bo‘yicha belgilangan majburiyat ixtiyoriy muddatda bajarilmaganligi sababli, qarzdor “INSOFT INVEST” MCHJ rahbari M.Z.Qurbanovga nisbatan O‘zbekiston Respublikasi MJtKning 1982-moddasi 2-qismiga asosan eng kam oylik ish haqining o‘n baravari miqdorida ma’muriy jarima qo‘llanilgan. 

Shuningdek, ijro xarakati davomida qarzdor “INSOFT INVEST” MCHJ rahbari M.Z.Qurbanovga sud qaroriga ko‘ra, o‘zboshimchalik bilan qurilgan qayta qurish ishlarini 2021 yilning 7 iyul kuniga qadar o‘z holatiga keltirish majburiyatini yuklash to‘g‘risidagi Talabnoma berilib, belgilangan muddat ichida majburiyat bajarilmagan taqdirda jinoiy javobgarlik masalasi qo‘llanilishi to‘g‘risida ogohlantirilishiga qaramasdan bajarmagan.
 
Shunga ko‘ra, Yakkasaroy tuman J.Shoshiy 2-tor ko‘chasida joylashgan qurilish bino inshooti o‘tgan yilning 16 iyul kuni bino inshooti kurilish ishlarini ko‘zdan kechirish va kurilish xududiga kirish eshiklarini muhrlash to‘g‘irisidagi dalolatnomaga asosan kirish eshiklari muhrlangan.

Bundan tashqari, ijro xarakatlari davomida qarzdor “INSOFT INVEST” MCHJ direktori lavozimiga fuqaro A.M.Ochilov tayinlanganligi aniqlanib, ijro hujjati yuzasidan qarzdor “INSOFT INVEST” MCHJ direktori A.M.Ochilovga 2021 yilning 13 avgust kuni rasman ogohlantirish xati va unga nisbatan O‘zbekiston Respublikasi MJtKning 1982-moddasiga asosan qo‘llanilgan jarima topshirilgan.

Shu bilan birga, Majburiy ijro byurosining Yakkasaroy tuman bo‘limi tomonidan berilgan ma’lumotnomaga ko‘ra, 2021 yilning 14 avgust kuni qarzdor “INSOFT INVEST” MCHJ direktori A.M.Ochilovning o‘z qo‘li bilan yozilgan majburiyatnomasiga asosan O‘zbekiston Respublikasi JKning 232-moddasida qo‘rsatilgan "Sud qarori ijrosini bajarmaslik va sud hujjatining ijro etilishiga to‘sqinlik qilish” bo‘yicha jinoiy javobgarlik masalasi hal etilishi yuzasidan qo‘shimcha muddat berilib, belgilangan muddat ichida bajarilmagan taqdirda Majburiy ijro byurosi Toshkent shahar boshqarmasining surishtiruv amaliyot bo‘limi sho‘’basi orqali surishtiruv hararakatlari olib borilishi ma’lum qilingan. 

Yakkasaroy tuman prokuraturasi tomonidan “INSOFT INVEST” MCHJ mansabdor shaxslariga nisbatan O‘zbekiston Respublikasi JKning 1921 -moddasi 1-qismi va 229-moddasi alomatlari bilan 262872/2021-132MR-sonli jinoyat ishi ko‘zg‘atilgan”, deyiladi javob xatida.

“Askiya city” ishi

2021 yiling 17 fevral kuni QALAMPIR.UZ saytida “INSOFT INVEST” MCHJning insofi bormi? Aholi noqonuniy qurilishdan norozi” nomli jurnalistik surishtiruv e’lon qilingan edi. Unda Toshkent shahrining Yakkasaroy tumani Jamshid Shoshiy ko‘chasida hech qanday ruxsatsiz, tasdiqlanmagan loyiha asosida “Askiya City” nomini olgan ko‘p qavatli turar joy majmuasi qurilgani, ushbu qurilish “INSOFT INVEST” MCHJ va “GRAND HOUSE” MCHJ tomonidan amalga oshirilgani haqida so‘z borgandi.

O‘tgan yilning 25 fevral kuni Toshkent tumanlararo Iqtisodiy sudida sudya Dilbar Xayrullayeva raisligida noqonuniy qurilish yuzasidan ish ko‘rilishi boshlanib, 2021 yil 6 aprel kuni sud tomonidan hal qiluv qarori e’lon qilindi. Qarorda “INSOFT INVEST” MCHJ va “GRAND HOUSE” MCHJ tomonidan qurilgan “Askiya City” turar joy majmuasini kompaniya hisobidan buzib tashlash belgilangan.

Oradan 7 oy o‘tsa hamki, sud qarorining ijrosi ta’minlanmayapti, noqonuniy qurilgan majmuada xonadon savdolari hamon davom etyapti. Shu sababdan fuqarolar sud qarorining ijrosi paysalga solinayotganini aytib, QALAMPIR.UZ’ga qaytadan murojaat qilishgan edi.

QALAMPIR.UZ holat yuzasidan Adliya vaziri Ruslanbek Davletov fikri bilan qiziqdi. Vazir sud tomonidan noqonuniy qurilish bo‘lgani aniqlangan bo‘lsa,  bu binolarning buzilishi tarafdori ekani, noqonuniy qurilgan binoga juda katta pul milliard, trillion kegan bo‘lsa ham adolat ta’minlanishi kerakligini ta’kidladi.