Niderlandiya Shvetsiyani yirik hisobda mag‘lub etdi

Bugun, 20 iyun kuni 2026 yilgi futbol bo‘yicha Jahon chempionati “F” guruhining 2-turidan o‘rin olgan Niderlandiya va Shvetsiya terma jamoalari o‘rtasidagi uchrashuv yakunlandi. Uchrashuvda Niderlandiya terma jamoasi 5:1 hisobida ishonchli g‘alabaga erishdi.

AQSHning Xyuston shahridagi “NRG Stadium” arenasida bo‘lib o‘tgan bahsni angliyalik hakam Maykl Oliver boshqarib bordi.

Hisob o‘yinning 5-daqiqasida niderlandiyalik hujumchi Brayan Brobbi tomonidan ochildi. U 17-daqiqada yana bir bor raqib darvozasini ishg‘ol qilib, dubl muallifiga aylandi.

Ikkinchi bo‘limda esa Kodi Gakpo o‘zini ko‘rsatdi. U 47 va 54-daqiqalarda gol urib, jamoasining ustunligini yanada oshirdi.

59-daqiqada shvetsiyalik hujumchi Entoni Elanga bitta to‘p kiritib, hisobni qisqartirdi. Ammo uchrashuvning 89-daqiqasida Krisensio Sammervill yakuniy nuqtani qo‘ydi — 5:1.

Ushbu g‘alabadan so‘ng Niderlandiya 4 ochko bilan “F” guruhida peshqadamlikni qo‘lga oldi. Shvetsiya 3 ochko bilan ikkinchi o‘rinda bormoqda. Guruhdagi boshqa jamoalar — Yaponiya va Tunis bahsi ertaga, 21 iyun kuni Toshkent vaqti bilan 9:00 da bo‘lib o‘tadi.

Guruh bosqichining so‘nggi turida, joriy yilning 26 iyun kuni Niderlandiya Tunisga qarshi maydonga tushsa, Shvetsiya Yaponiya bilan kuch sinashadi.

O‘yinda kiritilgan gollarni ushbu havola orqali tomosha qilishingiz mumkin.