Netflix шаҳзода Гарри ва Меган Маркл ҳақида фильм олди

Бир неча йилдан буён АҚШда истиқомат қилаётган Британия шаҳзодаси Гарри ва унинг рафиқаси Меган Маркл ҳақида суратга олинган ҳужжатли фильм трейлери Netflix платформасида бугун, 1 декабрь куни намойиш этилди.

Трейлерда фильмнинг премьера санаси айтилмаган бўлса-да, хорижий нашрларга кўра, ушбу ҳужжатли фильм премьераси 2022 йилнинг декабрь ойида бўлиб ўтади.

Ушбу ҳужжатли фильмдан шаҳзода Гарри ва Меган Марклининг шахсий фотосуратлари, уларнинг тўй тантаналари, Меган ҳомиладор бўлган вақтда жуфтликнинг Африкага амалга оширган сафари намойиш этилади. Қолаверса, Буюк Британия Қироллик оиласи билан улар биргаликда ўтказган сўнги оилавий тадбир ва уларнинг юқори лавозимдан тарк этган кунлари ҳам ҳужжатли фильмдан ўрин олган.

Мегал Маркл жорий йилнинг октябрь ойида АҚШ нашрларига берган интервьюсида премьераси кутилаётган фильм ҳақида сўз юритган ва суратга олиш жараёнларидаги ҳиссиётлари билан ўртоқлашган.

“Ўз тарихингни тажрибали режиссёрга ишониб топшириш ёқимли ҳолат, улар амалга ошираётган ишлар мени анчадан буён ҳайратга солади. Ушбу ҳужжатли фильмда томошабинлар бизнинг тарихимизни режиссёр кўзи билан кўради. Суратга олиш жараёнлари жуда қизиқарли бўлди. Сабаби менинг эрим бу йўналишда ҳали ўзини синаб кўрмаган. Атрофимиздаги ижодий муҳит, ҳамма биргаликда меҳнат қилаётгани ва барча ўз нуқтаи назари билан ўртоқлашиши эсда қоларли бўлди”, деган у.

Шунингдек 2023 йилнинг 10 январь куни шаҳзода Гарри муаллифлигидаги эсдаликлар битилган 416 саҳифали китоб тақдимоти ҳам режалаштирилмоқда.

Малумор ўрнида, “The New York Times” нашри берган хабарга кўра, улар 2020 йилнинг сентябрь ойида Netflix платформаси билан кўп йиллик шартномага имзо чеккан бўлиб, ҳамкорлик фақат ҳужжатли фильм билан чекланмайди. Ушбу фильм премьерасидан сўнг навбати билан ҳужжатли сериал, бадиий фильм ва болалар учун шоу дастур тақдим этилиши ҳам кутилмоқда.

Шаҳзода Гарри 1984 йилнинг 15 сентябрь куни Буюк Брияниянинг Лондон шаҳрида туғилган. У Британиянинг собиқ қироличаси Елизаветта II нинг набираси, амалдаги Қирол Чарльз III нинг кичик ўғли.

Унинг рафиқаси Меган Маркл 1981 йилнинг 4 август куни АҚШнинг Лос-Анжелес шаҳрида туғилган. У турмушга чиқишидан аввал актриса ва фотомодель сифатида фаолият юритган.

Уларнинг тўйи 2018 йилнинг 19 май куни Англияда бўлиб ўтган. Жуфтликнинг Арчи ва Лилибет исмли икки нафар фарзандлари бор.

Шуни алоҳида қайд этиш ўринлики, бу Netflix’нинг Қироллик оиласи ҳақидаги биринчи фильм эмас. Бунгача ҳам платформада Қиролича Елизавета II нинг ҳаёти, Қироллик оиласи машмашалари, Малика Диананинг вафоти ва Букингем саройидаги ўйинлар ҳақида фильм, сериаллар тақдим этилган.