Нетаньяхуни ағдариш учун партия тузилади

Исроилнинг собиқ бош вазирлари Яир Лапид ва Нафтали Беннет Кнессет (парламент) сайловлари олдидан ягона сиёсий партия тузилганлигини эълон қилди. Бу ҳақда “The Jerusalem Post” хабар берди.

Қайд этилишича, янги партия “Биргаликда” (“Beyachad”) деб номланади ва у “Еш Атид” партияси ҳамда “Беннет 2026” ҳаракати негизида ташкил этилади. Бирлашган рўйхатга Беннет бошчилик қилиши белгиланган.

Уларнинг мақсади — мухолифат лагерини бирлаштириш ва еттинчи муддатга ўз лавозимини сақлаб қолишга интилаётган бош вазир Биньямин Нетаньяхуни ҳокимиятдан четлатиш имкониятларини оширишдир.

“Мен мамлакатимиз учун биз қачонлардир амалга оширган энг сионистик ва энг ватанпарварона қадамни ташлаяпман. Бизнинг бирлигимиз бутун Исроил халқига йўлланган сигналдир: бўлиниш даври тугади. Тикланиш даври келди”, дейди Беннет.

Собиқ бош вазир “Яшар” партияси етакчиси Гади Айзенкотни ҳам уларга қўшилишга таклиф қилган. Шунингдек, Беннет коалиция тузиш учун энди араб партиялари билан ҳамкорлик қилмаслигини маълум қилган. 

“Биз на чап ва на ўнг блокка тегишлимиз, биз бутун Исроил халқи блокига кирамиз”, дея хулоса қилган у.

Ўз навбатида, Лапид ва унинг марказчи “Еш Атид” партияси “шахсий манфаатларни четга суриб, Исроил давлати учун тўғри бўлган ишни қилаётганини” айтиб, сайловда ғалаба қозониш учун Беннетни қўллаб-қувватлаш зарурлигини таъкидлаган.

“Бугун биз сайловда ғалаба қозониш ҳамда кучли ва барқарор сионистик ҳукумат тузиш учун бирлашмоқдамиз. Исроилда дунёдаги энг яхши одамлар яшайди. Улар армияда хизмат қилаётганларга, резервчилар ва уларнинг оилаларига сармоя киритадиган самарали, қобилиятли ва ҳалол ҳукуматга лойиқдир”, дейди Лапид.

Маълумот учун, Беннет ва Лапид 2021–2022 йилларда ўнг, марказчи ва чап партиялар коалициясига раҳбарлик қилиб, бирга ишлаган. Уларнинг янги иттифоқи октябрь ойи охирига белгиланган навбатдаги сайловларда ягона рўйхат билан қатнашади.

“Maariv” нашрининг яқинда ўтказилган сўровномасига кўра, Беннетнинг партияси Нетаньяхунинг “Ликуд” партияси билан тенг кетмоқда: у Кнессетда 24 та ўринни қўлга киритиши мумкин, Лапиднинг “Еш Атид” партиясига эса 7 та, Айзенкотнинг “Яшар” партиясига эса 12 та ўрин прогноз қилинмоқда.

Нетаньяхунинг партияси эса Х ижтимоий тармоғида сунъий интеллект ёрдамида яратилган расмни эълон қилди. Унда РААМ араб партияси етакчиси Мансур Аббос автомобиль рулида, орқа ўриндиқда эса Беннет ва Лапид ёш болалар кўринишида тасвирланган.

Беннет ва Лапиднинг 2021–2022 йиллардаги “ўзгаришлар ҳукумати” Аббос бошчилигидаги араб РААМ партиясини коалицияга киритиши билан тарихда қолган эди. Ушбу коалиция Нетаньяхунинг 12 йиллик узлуксиз бошқарувига чек қўйган, бироқ Нетаньяху 2022 йил ноябрдаги сайловдаги ғалабадан сўнг яна ҳокимиятга қайтган эди.