Нетаньяху Доҳага қилинган зарба учун Қатардан узр сўради

Исроил Бош вазири Биньямин Нетаньяху Доҳа шаҳрига қилинган ҳаво ҳужуми учун Қатардан узр сўради. Бу ҳақда ўз манбаларига таяниб, журналист Барак Равид хабар берди.

Маълумотларга кўра, Нетаньяху Қатар Бош вазири Муҳаммад бин Абдулраҳмон бин Жассим Ол Соний билан телефон орқали суҳбатда мамлакат суверенитети бузилгани учун узр сўраган ва ҳужум вақтида ҳалок бўлган хавфсизлик хизматчиси учун афсус билдирган.

“Reuters” манбасининг қайд этишича, бу қўнғироқ АҚШ Президенти Дональд Трамп билан Оқ уйдаги учрашув пайтида амалга оширилган. Шу ерда Ғазо бўйича ўт очишни тўхтатиш музокараларида қатнашган қатарлик ишчи гуруҳ ҳам бўлган. Нетаньяху Вашингтонга келишидан олдин Трамп Қатар Амири Тамим бин Ҳамад Ол Соний билан телефон орқали мулоқот қилган эди.

Ynet манбаларига кўра, узр сўрашни шахсан Трамп талаб қилган. Илгари Оқ уй раҳбари Исроил энди Қатарга зарба бермасликка ваъда берганини айтганди. Энди эса Доҳа ҳалок бўлган офицернинг оиласига товон тўланишини талаб қилмоқда. Хабарларга кўра, Исроил буни амалга оширишга тайёр.

Нетаньяхунинг айтишича, сентябрь бошида Қатарга қилинган зарбанинг мақсади ҲАМАС раҳбарларини йўқ қилиш бўлган ва “бундан бошқа ҳеч нарса эмас”. 

Исроил армияси зарба ҲАМАСнинг сиёсий бюроси раҳбари Холид Машал, ҳаракат етакчиларидан Халил ал-Ҳайя ва Зохир Жабаринга қаратилганини билдирган. Қатар эса Доҳада воқеа ҲАМАС раҳбарлари яшаган бинода бўлганини тасдиқлаб, Исроилнинг ҳаракатларини “дўстликка хиёнат” ва “давлат терроризми” деб атаган.

Ҳужумдан сўнг, Қатар, яъни Исроил ва ҲАМАС ўртасидаги асосий воситачи мамлакатлардан бири, ўз воситачилик ҳаракатларини тўхтатган ва уларни тиклаш учун Исроилдан расмий узр талаб қилган.

Эслатиб ўтамиз, аввалроқ Ўзбекистон Ташқи ишлар вазирлиги Исроилнинг ҳаракатларини қоралаб, баёнот билан чиққанди. Қолаверса, Ўзбекистон Президенти Шавкат Мирзиёев ҳам Қатар Амири Шайх Тамим бин Ҳамад Ол Соний билан телефон орқали мулоқот қилиб, Доҳага ҳужумни кескин қоралаганди.