Navoiydagi laboratoriyada portlash sodir bo‘ldi (video)

Bugun, 11 mart kuni Navoiy viloyatida joylashgan “Navoiy azot” aksiyadorlik jamiyatida gaz-havo aralashmasining chaqnash hodisasi sodir bo‘ldi. Bu haqda Favqulodda vaziyatlar vazirligi xabar berdi.

Ma’lum qilinishicha, soat 14:10 da Navoiy shahri Navoiy ko‘chasida joylashgan “Navoiy azot” aksiyadorlik jamiyatining 25-sexi laboratoriyasida gaz-havo aralashmasining chaqnashi hodisasi ro‘y bergan. Chaqnash oqibatida yong‘in kelib chiqqan.

“Shunga ko‘ra, hodisa joyiga 10 ta yong‘in-qutqaruv ekipaji yetib borib, hozirda yong‘inni bartaraf etish ishlari olib borilmoqda”, deyiladi xabarda.

Qolaversa, voqea joyiga viloyat Favqulodda vaziyatlar bo‘limi boshlig‘i, Ichki ishlar boshqarmasi, Sog‘liqni saqlash boshqarmasi va prokuratura xodimlari yetib borgan.

Shuningdek, vazirlik tomonidan qo‘shimcha ma’lumot taqdim etilishi aytilgan. Hozirga qadar voqea oqibatida halok bo‘lgan va jabrlanganlar haqida ma’lumot berilmagan.

Eslatib o‘tamiz, kecha, 10 mart kuni Qashqadaryo viloyatida joylashgan yoqilg‘i quyish shoxobcha hovlisida 2 ta 9 tonnali sig‘im yonib ketgani haqida xabar berilgandi. Yong‘in oqibatida 2 nafar fuqarolar kuyish tan jarohatini olgan.