Навальнийга оид жиноят иши судга юборилди

Россия Федерациясида мухолифатчи сиёсатчи Алексей Навальнийга нисбатан қўзғатилган жиноий иш материаллари Москва шаҳар судига келиб тушди. Бу ҳақда 25 май куни Россия оммавий ахборот воситалари хабар берди. 

Дастлабки даъволарга кўра, Навальний экстремистик жамиятни яратишда айбланган. Бироқ энди унга Россия Федерацияси Жиноят кодексининг яна олти моддаси бўйича эпизодлар қўшилди. Булар: экстремизмга даъватлар, фуқароларнинг ҳуқуқларини бузувчи нотижорат ташкилот ташкил этиш, экстремизмни молиялаштириш, экстремистик жамиятни яратиш, вояга етмаганларни хавфли қилмишларни содир этишга жалб қилиш ва нацизмни қайта тиклаш. 

Бундан ташқари, “Медиазона” интернет-нашри эътиборни тортганидек, иш файлига “Навалный LIVE” YouTube каналининг собиқ техник директори Даниэль Холоднийга тегишли мақолалар қўшилган. Ҳозирда у экстремистик жамиятда иштирок этиш ва уни молиялаштириш моддаси бўйича айбланиб, тергов изоляторида сақланмоқда.

Суднинг веб-сайтида ишни кўриш санаси кўрсатилмаган. 

Маълумот учун, Россия мухолифати етакчиси Алексей Навальний 2020 йилнинг 20 августида Россиянинг Томск шаҳрида заҳарланганидан сўнг, Германияда 4 ой даволаниб, 2021 йилнинг 17 январь куни Россияга қайтди ва дарҳол ҳибсга олинди.

Кейинроқ “Ив Роше” иши бўйича суд қилинган мухолифатчи 3,5 йилга қамалди. Ўлишига бир бахя қолган Навальнийнинг ўзи бир қатор интервью ва чиқишларида жонига суиқасд қилинишида тўғридан-тўғри Путинни айблаган.

2021 йилнинг 19 январь куни Навальний томонидан ташкил қилинган Коррупцияга қарши кураш фонди “Путиннинг қасри” ҳақидаги фильмни эълон қилди. У 100 миллион мартадан ортиқ томоша қилинди, ижтимоий тармоқлар эса шу мавзудаги мемларга тўлиб кетди. Ҳукумат унинг қаср эмас, апарт-меҳмонхона эканлигини ва унга Путин эмас, балки унинг дўсти Аркадий Ротенберг эгалик қилишини маълум қилди.

Москванинг Симонов туманлараро суди 2 февралда Навальнийни “Ив Роше” иши бўйича айбдор деб топиб, унинг жазони колонияда ўташи ҳақида қарор чиқарганди. Москва шаҳар суди 20 февралда қарорни қонуний деб топди ва суд ҳукми кучга кирди. 

Кейинроқ мухолифатчига нисбатан яна бир жиноий иш очилган. 2022 йилнинг март ойида у ўта катта миқдордаги фирибгарлик ва судга ҳурматсизлик моддалари бўйича 9 йилга қаттиқ режимли колонияга ҳукм қилинган. 

Россияда 2022 йил октябрь ойида Алексей Навальний ва унинг қатор шерикларига қарши экстремизм бўйича жиноий иш очилган эди.