Намангандаги хонадонда газ портлаши оқибатида 5 киши жароҳатланди 

Бугун, 12 декабрь куни Наманган туманидаги хонадонлардан бирида портлаш содир бўлди. Бу ҳақда вилоят Фавқулодда вазиятлар бошқармаси ахборот хизмати хабар берган. 

Таъкидланишича, соат 03:20 атрофида туманнинг Ғайрат МФЙ Беруний кўчасидаги уйда ёнғин содир бўлаётгани ҳақида маълумот келиб тушган. Қайд этилишича, соат 03:24 да Наманган шаҳар ва Наманган туман Фавқулодда вазиятлар бўлими ёнғин қутқарувчилари воқеа жойига етиб борган ва соат 03:26 да ёнғин жойи ўраб олинган. 

Маълум қилинишича, портлаш оқибатида уйнинг шифт ва том қисмидан 20 квадрат метр жойи ҳамда қисман уй-рўзғор буюмлари ёниб зарарланган, шунингдек хонадон эгаси, унинг турмуш ўртоғи, 3 нафар фарзанди (2 нафар қиз ва 1 нафар ўғил) куйиб тан жароҳати олган. 

Содир бўлган ёнғин Наманган шаҳар ва Наманган туман Фавқулодда вазиятлар бўлимининг ёнғин-қутқарувчилари томонидан соат 03:34 да ўчирилган. 

Таъкидланишича, чақнашга яшаш хонадонига тортиб келинган газ трубаси жўмраги носозлиги сабабли сизиб чиққан табиий газ хонага тўпланиши ҳамда уй эгасининг турмуш ўртоғи газ ҳидини сезмаган ҳолда электр чироғини ёқиши сабаб бўлган. 

Ҳозирда содир бўлган чақнаш юзасидан терговга қадар суриштирув ишлари олиб борилмоқда.