Наманганда хорижга ишга юборишни ваъда қилганлар ушланди

Наманган шаҳрида хорижий давлатларга ишга юборишни ваъда қилган шахслар ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди. 

Қайд этилишича, департаментнинг Наманган шаҳри бўлими ва ДХХ ходимлари ҳамкорлигида ўтказилган тезкор тадбирларда фуқаро М.А. фуқаролар М.С. ва А.К. нинг ишончига кириб, 2 000 АҚШ доллари эвазига Корея давлатига ишга юборишини айтган. У олдиндан 1 000 АҚШ долларини олганида қўлга тушган.

Яна бир ҳолатда фуқаро Р.М. фуқаро М.Б.ни 40 млн сўм эвазига Словакия давлатига ишга юбориши учун келишилган пуллар ҳисобидан 600 АҚШ доллари ва 2,8 млн сўмни олган вақтида ашёвий далиллар билан ушланган.

Билдирилишича, мазкур ҳолат юзасидан Жиноят кодексининг 168-моддаси (фирибгарлик) билан жиноят иши қўзғатилиб, тергов ҳаракатлари ўтказилмоқда.

Эслатиб ўтамиз, аввалроқ Тошкентда одамларни Хорватияга ишга юборишни ваъда қилиб, улардан пул олган шахслар қўлга тушганди.