Эрдўған Киев ва Москва ўртасида даллолликка рози бўлди

Туркия ҳукумати Украинада тезда ўт очишни, қуруқлик, ҳаво ва денгиздаги ҳужумларни тўхтатиш ғоясини қўллаб-қувватлайди. Бу ҳақда Туркия Президенти Ражаб Тойиб Эрдўған бугун, 7 март куни Европа Иттифоқига аъзо давлатлар раҳбарларининг онлайн йиғилишида сўз очди.

“Биз стратегик ҳамкоримиз бўлган Украинанинг ҳудудий яхлитлиги ва мустақиллигини қатъий қўллаб-қувватлаймиз. Биз адолатли, узоқ муддатли ва муносиб тинчлик учун курашаётган ҳар икки томон музокаралар столига ўтирадиган мустаҳкам дипломатик асоснинг муҳимлигига эътибор қаратамиз. Биз тез ўт очишни тўхтатиш ғоясини қўллаб-қувватлаймиз”, деган Туркия раҳбари.

Шунингдек, Эрдўған Туркия музокараларга мезбонлик қилишга  тайёр эканини билдирган.

“Биз Украинада шарафли тинчликни таъминлаш учун ҳар қандай ҳисса қўшишга, жумладан, музокаралар ўтказишга тайёрмиз”, деган Туркия раҳбари.

Қолаверса, Эрдўған Европа хавфсизлиги фақатгина ЕИга аъзо давлатларни эмас, аксинча, барча иттифоқчиларни ташвишга соладиган масала эканлигини ҳам қўшимча қилган.

Давлат раҳбари, шунингдек, Туркия ҳам Европа Иттифоқига кириш масаласида кенг кўламли ишлар амалга оширилаётганини айтиб ўтган.

“Биз тўлиқ аъзо бўлиш мақсадимизни қатъий сақлаймиз”, деган Эрдўған.

Эслатиб ўтамиз, 27 февраль куни Истанбулдаги АҚШ Бош консуллигида Россия-АҚШ музокаралари бўлиб ўтганди. Америка делегациясига АҚШ Давлат котиби ёрдамчиси ўринбосари Соната Коултер, Россия делегациясига эса Ташқи ишлар вазирлиги Шимолий Атлантика департаменти директори Александр Дарчиев бошчилик қилди.