Муроджон Аҳмадалиев жанг қиладиган мусобақанинг промо ролиги эълон қилинди (видео)

Биринчи ярименгил вазнда собиқ жаҳон чемпиони, Бутунжаҳон бокс ассоциацияси (WBA) камари учун расмий даъвогар Муроджон Аҳмадалиев 14 декабрь куни Монте-Карлода навбатдаги жангини ўтказади. Бугун, 4 декабрь куни Аҳмадалиев жанг қиладиган турнирнинг реклама ролиги эълон қилинди. Бу ҳақда Ўзбекистон Профессионал бокс федерацияси матбуот хизмати хабар берди. 

Видеороликда турнирда ретро услубидан фойдаланилган ва мусобақа доирасида рингга кўтариладиган боксчиларнинг мамлакатлари ўзига хос тарзда кўрсатиб берилган. Видеода Муроджон Аҳмадалиев номи чиққанда видеода Самарқанд шаҳридаги Регистон майдони тасвирини кўриш мумкин.

Қайд этиш жоиз, Аҳмадалиев “Matchroom” промоутерлик компанияси томонидан ташкил этилаётган профбокс оқшомининг марказий жангида рингга кўтарилади. Жанг ярименгил вазнда вактинчалик WBA камари учун бўлиб ўтади. 

Ўша куни 29 ёшли Аҳмдалиев мексикалик 27 ёшли Рикардо Эспиноса Франко га қарши рингга чиқади. Эспиноса WBA рейтингида 13-ўринни эгаллаб турибди. Рикардо Эспиноса Франко 2019 йилда енгил вазнда вақтинчалик WBO камари учун ҳам жанг ўтказган ва ўшанда у уч вазн тоифасида жаҳон чемпиони Жон Рил Касимерога 11-раундда нокаут билан ютқазган.

Эслатиб ўтамиз, аввалроқ оғир вазн тоифасида мутлақ жаҳон чемпиони украиналик Александр Усик ва WBC йўналиши бўйича собиқ жаҳон чемпиони британиялик Тайсон Фьюри ўртасидаги реванш жанги учун замонавий промо ролик тақдим этилганди.