Мундиал иштирокчилари сони 64 тага етказилиши мумкин

Кеча, 23 сентябрь куни FIFA президенти Жанни Инфантино Нью-Йоркда Жанубий Америка футбол конфедерацияси (КОНМEБОЛ) раҳбари Алехандро Домингес ва Жанубий Американинг бир неча футбол федерациялари президентлари билан учрашиб, эркаклар ўртасидаги 2030 йилги Жаҳон чемпионати иштирокчилари сонини 64 тага кенгайтириш таклифини муҳокама қилди. Бу ҳақда ESPN нашри хабар берди.

КОНМEБОЛнинг бу борадаги ташаббуси илк бор жорий йилнинг март ойида Уругвай делегацияси томонидан FIFA кенгашининг онлайн йиғилишида кўтарилган эди. Янги учрашувда Инфантино билан бир қаторда Аргентина ва Уругвай футбол ассоциациялари раҳбарлари, Парагвай Президенти Сантьяго Пенья ҳамда Уругвай Президенти Яманду Орси иштирок этган.

“Биз 2030 йилги тарихий Жаҳон чемпионатига ишонамиз! FIFA президенти Жанни Инфантино, бизни кутиб олганингиз ва футболнинг 100 йиллиги сари ушбу саёҳатни баҳам кўрганингиз учун ташаккур. Футбол умумий қадриятга айланганда, у ҳақиқий глобал байрамга айланади”, дейди КОНМEБОЛ раҳбари Алехандро Домингес.

Маълумки, 1998 йилдан бери Жаҳон чемпионати 32 жамоа иштирокида ўтказиб келинмоқда. 2026 йилда эса формат 48 жамоага кенгайтирилади. 2030 йилги турнир эса аллақачон тарихий аҳамият касб этмоқда. У уч қитъага тарқалган олтита давлатда ўтказилади. Уругвай (1930 йилда илк мундиал мезбони) рамзий маънода битта ўйинга мезбонлик қилади. Шунингдек, Аргентина, Парагвай, Испания, Португалия ва Марокаш ҳам мусобақага мезбонлик.

Агар турнир 64 жамоагача кенгайтирилса, КОНМEБОЛнинг барча 10 давлати қатнашиш имконига эга бўлади. Бу эса, жаҳон чемпионатида ҳали бирор марта ўйнамаган ягона Жанубий Америка мамлакати – Венесуэлага ҳам эшик очади.

“Бу шунчаки яна бир мундиал эмас. Асрда бир марта содир бўладиган воқеа. Уругвай, Аргентина ва Парагвайдаги гуруҳ босқичи ўйинлари тарихий аҳамиятга эга бўлади”, дейди Домингес.

Таклиф маъқулланса, мусобақада 128 та ўйин ўтказилади.  Бу 1998-2022 йиллар давомида амал қилган 64 ўйинлик форматдан икки баравар кўп дегани. Бироқ UEFA президенти Александр Чеферин бундай кенгайишни “ёмон ғоя” деб баҳолади. Танқидчиларнинг фикрича, 64 жамоалик формат ўйинлар сифатини пасайтириши ва саралаш жараёнини қадрсизлантириши мумкин.