Мумбайда кучли ёмғир оқибатида камида 6 киши ҳалок бўлди

Ҳиндистоннинг Мумбай шаҳрида тинимсиз ёғаётган кучли ёмғир оқибатида бир гуруҳ тураржой бинолари қулаб тушди. Ҳодиса оқибатида камида олти киши, жумладан, беш нафар бола ҳалок бўлди. Бу ҳақда “Reuters” хабар қилди.

Маҳаллий ҳокимият маълумотларига кўра, фожиа шаҳарнинг шарқий қисмидаги Манкҳурд ҳудудида содир бўлган. Харобалар мавзесида жойлашган икки-уч қаватли бир нечта бино қулаб тушган. Қурбонлар орасида бир нафар аёл ҳам бор. Кучли ёғингарчилик шаҳардаги транспорт тизимига ҳам жиддий таъсир кўрсатган. Мумбай-Пуне тезюрар автомобиль йўлида кўчкилар юз бериб, магистраль вақтинча ёпилган. Оқибатда икки шаҳар ўртасидаги транспорт ҳаракати тўхтатилган.

Телеканаллар тарқатган тасвирларда йўлга қулаган бетон бўлаклари ва туннеллар томидан оқиб тушаётган ёмғир сувлари акс этган. Ноқулай об-ҳаво сабаб авиқатновлар ва Мумбай-Пуне йўналишидаги айрим поездлар ҳам бекор қилинган.

Шунингдек, бугун, 6 июль куни кучли ёмғир ва сув тошқинлари сабаб мактаб ҳамда коллежлар фаолияти вақтинча тўхтатилган. Маҳаллий ОАВ кўчаларда сув кечиб юрган аҳоли тасвирларини эълон қилган.

Қайд этилишича, кучли ёғингарчилик оқибатида шаҳарда дарахтлар ҳам қулаб тушган. Ўтган ой охиридан буён бу каби ҳодисалар сабаб камида уч киши ҳалок бўлган. Метеорологлар маълумотига кўра, Мумбайда бир сутка давомида 100 миллиметрдан ортиқ, айрим ҳудудларда эса 161 миллиметргача ёғингарчилик кузатилган. Ҳиндистон метеорология хизмати яқин кунларда ҳам мамлакатнинг айрим ҳудудларида ёмғирлар давом этиши мумкинлигидан огоҳлантирди.

Эслатиб ўтамиз, жорий йилнинг 2 июль куни Покистоннинг бир қатор ҳудудларида кузатилган кучли ёмғир ва тошқинлар оқибатида камида 14 киши ҳалок бўлиб, ўнлаб одамлар жароҳатланди.